"KANUS-A ko makalakaw og balik, Pa?" Kini ang pangutana nga maglisod og tubag si Gerry Mondigo gikan sa iyang kamanghuran nga anak nga si Andre. Walo sila ka magsuon.
Dihang nagtungha pa sa Grade 4 sa Maihao Elementary School sa lungsod sa Cawayan, lalawigan sa Masbate ang 12 anyos nga batang lalake makalakaw pa kini, apan hinay. Pag Grade 5 niini, maglisod na kini og barug ug lakaw.
Ang bata may kondisyon nga gitawag og osteogenesis imperfecta. Usa kini ka genetic disorder diin naapektuhan ang mga bukog, ang uban nibaliko ug wala na mosubay sa normal nga pagtubo samtang nagkadako si Andre.
Apan bisan sa kakulian sa iyang lawas, wa kini makapugong kang Andre sa pagpadayon sa iyang pag-eskwela ug pagkab-ot sa iyang pangandoy nga mahimong usa ka civil engineer.
Niadtong Abril 5, nadawat ni Andre ang labing daghang mga pakpak gikan sa iyang classmates, schoolmates, mga magtutudlo ug mga ginikanan sa Opao Elementary School (OES), siyudad sa Mandaue, dihang nitungtong siya sa stage aron pagdawat sa iyang certificate samtang nagsakay og wheelchair atol sa ilang graduation sa Grade 6.
May mga tawo nga emosyonal samtang nagtan-aw kang Andre nga giubanan sa iyang 52 anyos nga inahan nga si Ma. Jennifer Mondigo ug mga maguwang nga sila si Gerry Margarito ug Lord Simon.
“Happy gyud ko para sa iyaha. Sa kadaw adlaw nga magsige mi og biyahe, mag-antos siya bisan og lisod, nabayran ang tanan sakripisyo kay nakahuman gyud siya sa Grade 6,” paambit ni Jennifer, maestra sa OES.
Maghilak
Ang inahan emosyonal samtang niuban kang Andre sa stage human niya makita ang mainitong suporta sa mga magtutudlo ug mga estudyante sa OES ngadto kang Andre.
Siya nipaambit nga dunay mga higayon nga mohilak siya sa tago kay nasakitan nga makita ang kahimtang sa iyang anak.
“Pinangga seguro ko sa Ginuo nga ako ang Iyang gipili nga mahimong inahan aning bataa. Nakita seguro Niya nga makaya nako, sa among pamilya,” pahayag sa ginang.
Siya ang kanunay nga kuyog ni Andre sa pag-eskwela sanglit didto usab siya nagtudlo sa OES.
Kaabag usab niini ang higala sa bata nga si Cristel Betache, 14, nga gipatungha nila ni Jennifer, nga maoy mo-ba o motulod sa wheelchair ni Andre labi na kon sila na lang duha ang mamauli gikan sa klase.
Sukad sa daycare hangtod sa Grade 5, kanunay nga honor student si Andre didto sa Cawayan.
Karon lang tuiga nga wa na ma-honor si Andre sa OES kay usahay naay mga higayon nga maka-absent kini sa mga klase labi na kon ting-uwan tungod kay maglisod sila og biyahe.
“Laban lang,” ang mubo nga tubag ni Andre sa iyang determinasyon nga makatiwas og tungha bisan sa iyang kahimtang.
Si Gerry ug Jennifer nihulagway ni Andre nga usa ka positibo, utokan, mahigalaon, ug manggihatagon nga anak.
Ang 54 anyos nga amahan daw kumoton ang kasingkasing kon ingnon sa anak nga gimingaw na kini nga molakaw ug kon kanus-a kini makalakaw.
Nagtampohay sila og kwarta ang mga miyembro sa ilang pamilya diin gibuak pa nila ang duha ka mga alkansiya aron ipalit og duwaan nga motor alang kang Andre aron may kalingawan.
“Way kwarta nga ikabaylo sa kalipay niya. Pinangga kaayo ni siya sa iyang mga maguwang,” dason ni Gerry.
Sigon ni Jennifer pagkagamay ni Andre kay normal pa ang mga bukog niini. Apan samtang kini nagka-edad, ilang nabantay nga ni-curve ang bukog niini sa bukobuko ug hinay ug dali na kapoyan nga molakaw.
“I-treat nila nga VIP (very important person). Kay kani espesyal nga gihimo sa Ginuo kay gift ni siya gikan sa Ginuo,” hangyo ni Jennifer sa ubang mga tawo sa pagtratar sa iyang anak. Siya nidugang nga si Andre ang hinungdan kon nganong kanunay sila magkatapok mga miyembro sa pamilya ug mag-bonding. Paborito niya ang duwa nga chess.