NIHANGYO si Carmen Mayor Martin Gerald Villamor sa kagamhanan sa lalawigan sa Sugbo nga mopahigayon og laing public consultation sa gisugyot nga sanitary landfill nga tukoron sa Barangay Dawis Sur sa ilang lungsod.
Pahibawo ni Cebu governor Hlario Davide III base sa suwat nga iyang nadawat gikan sa mayor. Sumala sa gobernador wala pa niya mabasa ang kinatibuk-ang suwat, apan si Villamor nihangyo niya nga mag-public consultation na usab sa mga tawo sa Carmen.
Matod pa nahuman na ang public hearing sa Barangay Dawis Sur duha ka tuig na ang nakalabay, gani ang barangay nipalabang na og resolution ingon man ang lungsod sa Carmen nga nag-endorso sa proyekto.
Apan sa laing public consultation nga nahitabo niadtong Marso ning tuiga, ang mga residente sa Carmen labi na sa Barangay Dawis Sur nihangyo sa Kapitolyo nga pugngan una ang pagpatuman sa proyekto ug mohimo og laing public hearing.
Ang mga molupyo nabalaka nga maapektuhan ang bugtong tinubdan sa ilang tubig ug ang ilang panglawas ug panginabuhian.
Si Davide nibutyag nga i-refer niya ang suwat sa mayor sa public-private partnership committee ni Provincial Board Member Miguel Antonio Magpale kon mopatawag ba og laing konsultasyon sa publiko.
Sa higayon nga adunay laing konsultasyon ipahigayon kini tapos na sa Mayo 13 election.
Si vice governor Agnes Magpale sa iyang bahin way problema kon mohimo og laing hugna sa public hearing.
Siya niasoy nga sila si Danao City Mayor Ramon “Nito” Durano III, ug Villamor uban sa mga konsehal sa Carmen ug mga mayor sa ikalimang distrito sa Sugbo ang mikuyog ni Davide didto sa Tacloban aron masayran ug matun-an ang paagi sa pag-andam sa BEST ang luna sa dili pa labayan sa mga basura. (SCG)