GISIBOG na usab ngadto sa adlawng Biyernes, Mayo 10, ang gi-andam nga debate sa Integrated Bar of the Philippines (IBP) Cebu City chapter, tali sa mga kandidato sa pagka-mayor ug bise mayor sa dakbayan sa Sugbo.
Orihinal nga schedule gikatakda unta niadtong Lunes, Mayo 6 apan wa mahinayon.
Kini sa dihang nasabutan atol sa board meeting niadtong Domingo, Mayo 5 nga mohatag og higayon sa kampo ni mayoralty candidate Edgar Labella nga mipahibawo pinaagi sa Facebook post nga dili siya makatunga sa na-unang schedule sa debate kay adunay importante nga tambungan nga tigum sa kaulohan.
Matod ni IBP Cebu City Chapter President, Regal Oliva nga gitawgan siya sa chief of staff ni Labella nga nagpahibawo sa maong kalambuan.
“We are postponing it to May 10, we are giving in to the requrst of Vice Mayor Edgar Labella our concern lang is, if we push through mo-proceed mi tomorrow mosulti napud ning supporters ni Labella that the IBP is biased sa Osmena.
“So kami lang okay, will push it through anyway May 10 is still before elections,” pasabot ni Oliva sa Superbalita Cebu.
Apan dili molingkod isip chairman sa debate si Oliva nga maoy nangulo sa pag-organisa sa maong kalikuhan.
Nasayran nga daghang atimanon ang opisyal ilabi na nga nagkaduol ang piniliay sama nalang sa pag-andam sa mga election paraphernalia sa dakbayan sa Mandaue nga ipang apud-apod sa mga magtutudlo alang sa kapin 200 ka polling places.
Si Atty. Oliva mao usab ang City treasurer sa kagamhanan sa Mandaue.
Mohulip isip chairman sa board mao ang secretary sa IBP nga si Atty. Bernardino Amago, apan anaa gihapon si Oliva uban sa mga opisyal ug mga sakop sa IBP atol sa debate sa Mayo 10.
Samtang ang kampo nila ni re-electionist Cebu City Mayor Tomas Osmeña ug sa iyang running-mate Mary Ann delos Santos mi-uyon ra usab sa kausaban sa pagsibog sa maong petsa.
Nanghinaot ang IBP nga ning ikaduhang pagsibog sa schedule mosanong na ang vice mayoralty candidate ni Labella nga si kanhi mayor Michael Rama.
Ang maong debate magsugod sa 1:00 p.m. ngadto na sa 3:30 p.m. sa Mayo 10 nga ipahigayon sa City Sports Club.
Sa kadtong aduna nay ticket sa orihinal nga schedule nga mosaksi sa debate mao ray gamiton sa Mayo 10. (FMD)