P8.00 nang minimum nga plite

MAHIMO na nga P8 gikan sa P6.50, ang minimum nga pletihan sa mga public utility jeepney sa Sugbo.

Ang Land Transportation Franchising and Regulatory Board niaprobar sa rekomendasyon sa rehiyonal nga buhatan nga P8 nga provisional nga usbaw sa pletihan sa unang lima ka kilometros base sa Board Resolution No. 072 nga pinetsahan og Abril 24.

“Effective immediately per board resolution,” pagkompirmar ni LTFRB 7 Director Eduardo Montealto Jr. sa text message nga gipadala sa Superbalita Cebu niadtong Lunes, Mayo 6.

Apan ang director niklaro nga dili makakolekta sa bag-ong pletihan ang mga drayber kon way bag-ong taripa.

Sugod karong Miyerkules, Mayo 8, mahimo nang makuha sa mga drayber ang bag-ong taripa sa rehiyonal nga buhatan sa LTFRB 7.

Ang bag-ong pletihan ipublikar sa LTFRB 7 sa mantalaan karong Martes, Mayo 7, nga mabasa sa kadaghanan.

Sigon ni Montealto ang unang lima ka kilometros lang ang gipausbawan ug magpabilin ang P0.90 nga pletihan sa mosunod nga kilometro.

Nitugot ang LTFRB sa provisional nga umento human makita ang pag-usab-usab sa presyo sa diesel sa merkado nga makadaghan nang nisaka inubanan sa pagmahal usab sa presyo sa spare parts ug ubang galastohan sa pag-operate og PUJ.

“...the board is not insensitive to consider the welfare of these operators and drivers, and as much as possible maintains the balance between their rights and with that of the commuting public,” tipik sa maong resolusyon.

Dugang sa resolusyon, base sa records sa maong buhatan, nasayod ang board nga wala tugoti og umento sa pletihan ang mga PUJ sa Central Visayas sukad niadtong 2016 dihang nagsunodsunod ang pagsaka sa presyo sa diesel.

Niadtong Abril 19, 2019, nadawat sa Board ang suwat gikan sa 1-United Transport Koalisyon (1-UTAK) nga nangayo og P2 nga provisional increase sa minimum nga pletihan alang sa mga PUJ nga nag-operate sa rehiyon.

Apan ang Basak Lapu-Lapu City Jeepney Operators and Drivers Association (Balacjoda) wa makauyon sa P1.50 nga provisional nga umento sa minimum nga pletihan.

“Di mi uyon ana kay dili man ang 1-UTAK ang nag-file sa petition, ang Balacjoda man. Ilang tubagon ang among petition kay taudtaod naman to, wa man silay aksyon,” sigon ni Metudio “Boboi” Belarmino, consultant sa Balacjoda.

Moduso sila og urgent motion sa LTFRB aron matagad ang ilang petition nga nangayo og P2.50 nga umento sa minimum nga pletihan sa PUJ.

Apil sa mga reason nga gihatag sa 1-UTAK ang kanunay nga pagsaka sa presyo sa diesel sa merkado diin niadtong Pebrero 2016, nagkantidad pa kini P20 ngadto sa P21 dihang P6.50 ang minimum nga pletihan kon itandi sa P43.26 ngadto sa P47.29 base sa pump price monitoring sa Department of Energy (DOE) Visayas.

Laing rason mao nga ang P6.50 nga pletihan sa unang lima ka kilometros maoy labing ubos nga minimum nga pletihan sa Pilipinas human ang Board nitugot sa umento sa pletihan sa PUJ sa ubang mga rehiyon sama sa National Capital Region, rehiyon III, IV ug Western Visayas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph