FEELING sa akong amigo nga luwas gikan sa krimen, matod pa niya sa iyang Facebook post, tungod sa mga police checkpoint nga iyang naagi-an gikan sa Labangon padulong sa downtown sa miaging Dominggo.
Apan iyang gidugangan sa pag-ingon nga angayang ipahigayon ang maong mga checkpoint layo sa mga politikanhong kalihokan ug layo sa mga balay sa mga politiko.
Lahi na man gud kon ang checkpoint mismo anha tungod sa gate sa balay ni Mayor Osmeña ipahigayon ug ang sitahon mao ra ang mosulod ug mogawas sa maong gate atol sa Semana Santa. Ang mga gikan sa Monterazas wa lang hilabti.
Dayon si PRO 7 Director General Debold Sinas masuko sa pagdawat og sandwich gikan kang Konsehal Margot Osmeña kay di na kuno neutral ang kapolisan busa iyang girelibo ang nidawat niini. Wala mokwestyon si Sinas nganong diha man gyud tungod sa gate gipahigayon ang maong checkpoint.
Dayon makakita kitag front page photo sa usa ka mantalaan nga nga daw kasul-obon si Sinas nga nagsud-ong sa campaign T-shirt nga gibukhad ni Presidential Assistant for Visayas Mike Dino.
In fairness ni Sinas, mas kwestyonable ang usa ka opisyal sa kagamhanan nga aktibong nangampanya. Gani, usa ka tigsuporta ni Bise Mayor Edgar Labella nangutana man kanako diha sa Facebook Group nga Maghisgot Kitag Politika Bay nga wala ba makalapas sa balaod si Dino.
Ako dayong gitawgan dayon kining akong higala nga nakadayeg sa mga checkpoint ug gipangutana kon ang iyang gipasabot nga mga checkpoint mao kadtong daghan nga gipahigayon sa miaging Dominggo ug ang gipangsita mao lang ang gidudahang mosalmot sa higanteng miting de abanse sa BOPK?
Tungod niini, daghan gyud ang nakapangutana kon nganong namulitika ang kapulisan.
Bisan pa man, daw wa matarog ang Sugbo sa gibuhat sa kapulisan. Gani, motambag ko sa ilang kaatbang nga angayang ilang balikon pag-analyze ang ilang survey kay alang kanako, nakakuha man hinuon og simpatiya ang BOPK.
Gani, gibiyaan na man hinuon si Mike Rama kang Mary Ann delos Santos bisan diha sa South District. Sila raman unta to si Rama ug Delos Santos ang fight pero karon, tungod sa gipakita niyang kaisog atubangan sa police harassment, nisutoy hinuon siya sa mga survey.
Busa, balikon ko nga angayang i-review sa Barug ang ilang stratehiya nga mosalig na lang sa intimidasyon ginamit ang kapulisan.
DIGONG
Hinuon, tan-awonon pa kon makabawi ba ang Barug karong ila usab nga Miting de Avanse labi na nga gipaabot nga mobalik si Presidente Rodrigo Duterte. Bisan pa man, tan-awonon sab kon sagol ba sa maong rali ang mga botante sa lalawigan kay kining sa BOPK taga syudad ra man gyud. (@anol_cebu sa Twitter)