SERYUSO kining alegasyon nga gipabuhagay ni Cebu City Mayor Tomas Osmeña batok ni Cebu City Police Office (CCPO) Director Royina Garma.
Atol sa miting de avance sa Bando Osmeña Pundok Kauswagan (BOPK) nga gipahigayon niadtong Dominggo sa Cebu City Sports Complex, way panagana nga gibutyag ni Osmeña nga tigdawatan og P1 million matag semana nga payola si Garma gikan sa mga gambling operators didto sa Bohol.
Kini panahon niadtong si Garma pa ang hepe sa Criminal Investigation and Detection Group (CIDG) sa Rehiyon 7.
Gibasehan ni Osmeña sa iyang alegasyon mao ang suwat nga gipirmahan ni Manuel Fraginal Sr., ang nationwide inter-branch security monitoring chief sa Philippine Charity Sweepstakes Office (PCSO), nga gi-address ngadto ni Department of the Interior and Local Government (DILG) Secretary Eduardo Año nga pinitsaha og Mayo 16, 2018.
Ang maong suwat gibasa ni Osmeña atubangan sa gibanabanang 25,000 ka mga BOPK supporters nga mitambong sa maong miting de avance.
Matod ni Osmeña nga ang mga dokumento nga anaa sa iyang mga kamot karon gikan ra usab sa National Bureau of Investigation (NBI), National Police Commission ug sa PCSO.
Hugot ug daling gipanghimakak ni Garma ang maong akusasyon.
Ingon niya nga nitumaw kining isyu kaniadto sa dihang gidungog nga siyay ipuli isip general manager sa PCSO.
Tinuod man o dili ang maong akusasyon, apan daw og sa adunay nakab-ot si Osmeña sa iyang unang katuyoan. Ug kini mao ang pagguba sa reputasyon ni Garma.
Pero nganong si Garma man ang gisentro ni Osmeña sa ilang politikanhong rally nga unta di man kini maoy ilang kaatbang sa eleksiyon? Buot ba ipasabot nga ilang nalantawan nga si Garma mao usa ka dakong babag sa umaabot piniliay?