GIPANGPUKAN sa Toronto Raptors ug Denver Nuggets ang ilang tagsatagsa ka kontra sa Game 4 aron tablahon ang duha ka conference semi-finals series, 2-2, kagahapon sa National Basketball Association (NBA).
Ang Raptors ninglupig sa host Philadelphia 76ers, 101-96, sa Eastern Conference samtang gipangbuntog sa Nuggets ang host Portland Trail Blazers, 116-112, sa Western Conference.
Si Kawhi Leonard nagpakatap og 39 puntos lakip na niini ang krusyal nga three-point shot aron pangulohan ang Raptors.
“Just really growing up learning from great players, I was fortunate enough to be on some good teams early,” matod ni Leonard, “so I was able to see defenses and go on deep playoff runs and I feel that helped me out today.”
Nidugang og 16 puntos si Marc Gasol alang sa Raptors samtang niamot og 14 puntos si Kyle Lowry.
Nagkanayon si Raptors coach Nick Nurse nga gimanduan niya ang iyang mga batos nga kinahanglang moagresibo ug dili magpanagana sa pag-itsa kon adunay kahigayunan.
“We needed some punch around the roster,” asoy ni Nurse. “It was a different mentality. Guys were looking to shoot, taking the first shot that was there.”
Ang 76ers gipangulohan ni Jimmy Butler pinaagi sa iyang 29 puntos samtang nihatag og 19 puntos si JJ Redick.
Si Joel Embiid, kinsa nimugna og 33 puntos sa dakong kadaugan sa 76ers sa Game 3, bugnaw nga nakaduwa ning higayuna ug igo lang kining nakapupo og 11 puntos.
Matod ni 76ers coach Brett Brown nga adunay gipamati sa lawas si Embiid hinungdan nga wala kini nakakombati og insakto.
Sa laing duwa, nagpakatap og triple-double nga 21 puntos, 12 rebounds ug 11 assists si Nikola Jokic aron tabangan ang Nuggets sa paglupig sa Trail Blazers.
Mao kini ang ikaduhang sunodsunod nga triple double ni Jokic ug ikaupat sa kinatibuk-an sa playoffs.
Ang Nuggets, nga nasugamak sa upat ka mga overtime nga kapildihan sa Game 3, wala nakitaan og senyales sa kahago, timaan lang sa ilang determinasyon.
“I think it’s not quitting. We have a lot of competitive guys who don’t want to lose. I think we don’t want to lose more than we like to win — which is weird,” matod ni Jokic. “We just didn’t want to have the excuse that we lost because of four overtimes, because we were tired.”
Ang Nuggets gipangulohan ni Jamay Murray pinaagi sa iyang 34 puntos.
Sa ilang bahin, ang Trail Blazers gipangulohan ni CJ McCollum pinaagi sa iyang 29 puntos samtang nihatag og 28 puntos si Damian Lillard. (AP, ESL)