NASUGAKOD ni Mary Joy Tabal ang malisod niyang high-altitude training nga tipik sa iyang preparasyon alang sa 2019 Ottawa Marathon nga gikatakda karong Mayo 26 sa City of Ottawa, Canada.
Ang sakop sa MotorAce Kawasaki Racing Team nisagubang og usa ka semana nga training sa bukirang bahin sa Nagano, Japan sulod sa usa ka semana diin iyang kauban ang runners sa Nippon Sports Science University.
Si Tabal, kinsa lumad nga taga brgy. Guba, dakbayan sa Sugbo, nagsugod og training sa Japan niadto pang Pebrero.
Gawas sa Ottawa Marathon, nga usa ka Olympic qualifying race, nangandam sab si Tabal alang sa Southeast Asian (Sea) Games.
Gipasabot ni Tabal, 29, nga sa bukid sa Nagano, katulo sila mag-training sa usa ka adlaw.
Giklaro ni Tabal nga nakatutok lang sila sa ilang training, gani dili sila bastabasta makagamit sa ilang cellphones.
Matod ni Tabal nga ang ilang kalipay atol sa ilang training sa bukid mao ang oras sa ting panihapon.
Asoy ni Tabal nga ang katuyoan ning maong training mao ang pagsukod sa ilang kalig-on sa pisikal o hunahuna.
Sa Ottawa Marathon, tinguha ni Tabal nga maka-qualify siya alang sa 2020 Tokyo Olympics. Ning maong marathon sab naka-qualify si Tabal sa 2016 Rio Olympics. (RSC, ESL)