NAGPAHIGAYON og motorkada ang kapulisan, kabomberuhan, mga sakop sa Bureau of Jail Management and Penology, sa Dakbayan sa Mandaue, alang sa limpyo ug malinawon nga piniliay, Martes sa buntag, Mayo 7.
Pinanguluhan ang maong motorkasa sa Department of Interior and Local Government (DILG).
Gisugdan sa Mandaue City Sports Complex ang motorkada, alas 7 sa buntag, diin gilibot nila ang mga dagkong dalan sa syudad.
Gitug-an ni Mandaue City Police Office director, Police Colonel Julian Entoma, kinsa usa sa nangulo sa maong kalihukan nga usa kini ka paagi alang sa pagpanawagan ug pagpahinumdom nga dili ang pagbaligya sa boto.
Ang motorkada gitawag og “Ang Suhol ay Iwaksi Natin (Asin), Itaguyod Legal at Wasto (Ilaw),” ang maong panawagan ang una nga gi-adbokasya sa Simbahang’ Katoliko nga gisunod usab sa kapulisan sa Dakbayan sa Mandaue.
Dugang ni Entoma nga susama usab kini sa adbokasya ni Police Regional Office- Central Visayas Director, Brigadier General Debold Sinas, hinungdan nga niawhag kini sa mga lalaki nga pulis nga magpa-opaw, ug bisan na gani sa uban, isip pag-awhag ug pagpahinumdom alang sa limpyo nga piniliay.
Lakip sa panawagan niini ang “No to Terrorism.”
Moabot sa dul-an 300 ang nisalmot gikan sa Mandaue City Police Office (MCPO) nga personnel, lakip na ang mga bombero sa Mandaue City Fire Station ug mga kawani sa Bureau of Jail Management and Penology Mandaue City, mga taga DILG ug anaa usab ang mga sakop sa guardians, ug mga clean riders nga grupo.
“Gi-awhag man ta ani sa DILG national office ug sa Philippine National Police nga mohimo sa maong event, as a way pag-remind sa public, sa voters nga mali gyud nga mag-vote buying ug magpadala ani. Pagpakita sad ni og pagbatok sa terorismo,” pagpasabot ni Entoma.
Samtang sa alas 6:30 Huwebes sa buntag, Mayo 9, himuon ang santos nga misa sa National Shrine of St. Joseph, isip sending-off mass sa mga pulis ug mga magtutudlo sa Syudad sa Mandaue nga moserbisyo sa piniliay.
Isunod dayon ang showdown inspection, pagsusi sa mga gamit sa pulis, kon kompleto na, una sila i-deploy sa ilang tagsa-tagsa ka assignment nga mga tunghaan.
Sa alas 8 sa buntag, sugdan na ang pagpadala kanila uban na ang mga vote counting machine (VCM) sa matag polling places.
Sa Biyernes, Mayo 10, himuon na usab ang final testing ug sealing sa mga VCM.
Samtang 90 sa mga pulis sa MCPO ang idugang ngadto sa silingang lugar, 60 alang sa Cebu Provincial Police Office ug 30 alang sa Bohol Provincial Police Office.
Bisan kon tutok ang kapulisan alang sa pagsiguro sa malinawon nga piniliay, bahad ni Entoma ngadto sa mga nalambigit sa ilegal nga drugas ug sa uban nga nagtinguha sa paghimo og krimen nga padayon ang kapulisan paggukod kanila. (FMD)