DAGHAN ang nangutana kinsa ang mohulip ni kanhi mayor Vicente “Dongkoy” Emano sa iyang kandidatora pagka-bise mayor sa siyudad sa Cagayan de Oro karong Mayo 13 human kini nipanaw.
Sunod nga pangutana sa katawhan sa siyudad kon mahulipan pa ba kini sa magpapili labina nga lima na lamang ka adlaw ug piliay na sa Mayo 13.
Apan si Commission on Elections-Northern Mindanao Director Wilfred Jay Balisado nikumpirmar nga mahimong mahulipan ang kandidatora ni Emano.
Pwedeng mohulip sa pagpapili ang anak o asawa niini nga adunay susamang apelyidong Emano isip substitution.
Giawhag niini nga kung kinsa man ang mahukman sa pamilya nga mohulip sa iyang kandidatura nga moduso na og sertipiko de kandidatura dungan sa pag-attach sa death certificate ni Dongkoy Emano.
Apan pagklaro ni Balisado nga tungod kay anaa na sa balota ang pangalan ni Dongkoy Emano, mao gihapon kini ang botaran sa katawhan bisan paman gihulipan kini sa kinsa man mohulip sa kandidatura niini.
Pipila sa mga supporters sa partido PaDayon Pilipino nikumbinsir sa pamilyang Emano nga si Nadya ang kwalipikado sa posisyon labina nga number one kagawad sa siyudad ug katapusan na usab niining termino nga pwedeng magpapili sa laing posisyon.
Apan tubag ni Governor Bambi Emano nga wala pa kini nila nadesisyunan hilabina anaa pa sila taliwala sa pagbangutan sa kamatayon sa ilang amahan.
“Wala pami kaestorya kay human sa hitabo nagsige pami bulag-bulag magsuon kay naa mi lain-laing tahas, ako karon nag-atiman unsaon pagpahaluna sa patayng lawas sa akong amahan. Sa adlawng Sabado na basin maestoryahan lang kana,” matud ni Bambi.
Kahinumduman nga no show si Dongkoy sa mga kampanya ug rally matag gabii ug sagad sa mohulip kaniya nga moestorya ug mangampanya mao si Kagawad Nadya.