SECTIONS
Saturday, July 20, 2019
SUPERBALITA CEBU

Diputado: Kusog palit sa boto

Cuentas claras

HUROT gyod ang mga tag-20 ug tag-50 nga papel de bangko karong mga panathona.

Asa man diay padung nga nangawala man?

Gipang-tagoan aron estepleran para sa mga sample ballots.

Mga bangko, mga tindahan, tanan pulos nag-reklamo nga nahutdan gyod sila og tag-20 ug tag-50.

Apan dili kini katingad-an.

Ngano man?

Tungod kay nagkaduol ang piniliay, nagkaduol na sab ang panahon nga mamalit ang mga politiko sa boto sa mga botante.

Nahibalo ang katawhan niini, apil ang taga-Comelec.

Gidili sa balaod ang pagpamalit og boto. Gani, gitawag kini og election offense sa Omnibus Election Code.

Dunay pagka-preso og dunay perpetual disqualification from holding public office nga silot sa masakpan.

Apan sukad gibutang ang maong lagda, wala pa gyod mahitabo nga dunay gikasohan o napreso tungod sa pagpamalit sa boto.

Ngano man kaha?

Tungod kay daghan ang mo-reklamo apan walay bisan usa nga andam momatuod sa hukmanan nga nahitabo gyod ang pagpamalit.

Kusog lang moreklamo apan dili andam mobarog sa iyang reklamo didto sa hukmanan.

Mao kini hinungdan nga dili gyod maundang kining gitawag og vote-buying.

Ang simbahan, ingon man ang pipila ka mga civic-religious groups kusog kaayo ang ilang pag-batikos sa vote-buying.

Gani, duna silay lagda nga angay sundon sa mga botanteng katoliko.

Gidili ang pagbaligya sa boto, matod pa.

Taas ang Homily tungod kay gawas sa gibasa nga pastoral letter, duna pa gyoy personal nga awhag ang mga kaparian.

Naminaw lang usab ang mga nanimbahay.

Kanunay nila kini buhaton kon dunay piniliay. Gani, ang ubang mga kaparian mora na og nangampanya panahon sa Homily tungod kay gawas sa pag-awhag sa No to Vote Buying, ila sab nga iapil ang pagbatikos ni Presidente Digong.

Naminaw lang usab ang mga nanimbahay. Yango-yango pa sa ulo ang uban.

Apan, naundang ba ang vote-buying?

Wala gyod tungod kay padayon ang mga katawhan sa pagbaligya sa ilang boto.

Sama sa way nadungog ang mga nanimbahay sa gisulti og balik-balik sa mga kaparian.

Unsa man kahay hinungdan niini?

Nganong dili man motuo ang mga katawhan sa giawhag sa mga kaparian?

Ang nakanindot ra ba kay sama sa nagakamahal ang boto karon.

Sa unang panahon, maayo na kaayo nga makadawat ka og 100 para sa mga kandidato sa lungsod, sama sa mayor, bise-mayor ug mga kagawad.

Apan karon, lahi na.

Moabot na sa 1,000 ang madawat sa mga botante alang sa mga kandidato sa lungsod.

Ang uban, moabot pa gani og 3,000 ngadto sa 5,000 kada botante ng ihatag, labi na kon magkaduol na ang piniliay.

Segurado nga mapildi ang kandidato nga mohatag sa ubos nga kantidad.

Ngano man kini?

Nganong dili man motohop sa kasing-kasing ug huna-huna sa mga botante ang gipang-yaw-yaw sa mga kaparian?

Mao kini hinungdan sa pagka-wala sa mga tag-20 ug tag-50.

Gamiton kini para ipamalit sa mga botante.

Mao usab kini hinungdan nga human sa piniliay, makita nimo nga dunay “samad” ang mga kwartang papel.

Human sa piniliay, kusog ang palit sa mga cellphones, mga himan sa panimalay og ingon man mga sakyanan.

Bibo ang mga department store kay kusog ang pangumpra para pista.

Kwartahan ang mga tawo human sa piniliay.

Mao kini rason nga dili na ikatingala kining pagka-hanaw sa mga kwartang papel panahon sa piniliay.

Bibo ang wilwigay o uwan-uwan.

Maayo ba kini o dili?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph