DAGHANG panghitabo nga gituhoang may kalambigitan sa nagsingabot nga May 13, 2019 local election.
Ang kainit nasentro sa mga siyudad sa Sugbo ug Lapu-Lapu ug naglakip sa lungsod sa San Fernando.
Sa siyudad sa Sugbo, mireklamo na si Cebu City Mayor Tomas Osmeña, sa nahitabong pagpangharas sa mga kaalyado niini sa pulitika.
Ang nakangil-ad kay giapil-apil ni Osmeña ang kapulisan nga maoy nanghasi sa iyang mga kaalyado didto sa kabukiran.
Nga para nako sa panag-away kanila ni Tomas ug Superintendent Royina Garma, hepe sa Cebu City Police Office (CCPO) di lang ilambigit ang kapulisan ngadto sa pulitika.
Ang away ni Osmeña ug Garma, tungod niadtong pagpabuhi sa mayor sa mga piniriso nga nadakpan sa ilegal nga butane.
Karong bag-o gihimakak ni Garma ang pasangil ni Osmeña nga nagdawatan og P1 milyon nga payola gikan sa illegal gambling sa Bohol.
Ang nahitabo si Osmeña ang nakuhaan og hulagway nga nagduwa og poker sa illegal nga duwaan og poker.
Kini maoy di maayong timailhan nga moresulta unya sa duguon nga panghitabo nga moresulta nga aduna unyay mamatay.
Para nako ang eleksiyon karon usa sa mga bantayanan human sa mga dugoong panghitabo nga duna na gani namatay.
Samtang, gipahibawo ni Lapu-Lapu City mayoralty bet Boy Radaza, nga dunay tinguha ang iyang kontra sa pulitika (Ahong Chan) sa ronda sa iyang panimalay ug planteran og shabu.
Mao nga nagmabinantayon karon ang kampo ni Radaza, kay wa may dag-anan ug di makadaog ang kontra sa pulitika. Ang pamilyang Radaza nakagamot na tungod sa ilang mga daghang nahimo nga maoy nakapaglambo sa siyudad sa Lapu-Lapu.
Sa San Fernando, Cebu, giambusan ang ilang ambulansya didto sa siyudad sa Naga.
Ang ambulansya kanunay kini nakaestambay sa panimalay ni Mayor Reluya. Nagtuo tingali ang mga suspek ang ambulansya na ang paga sakyanan ni Reluya.
Kon atong sabton tuyo gyud sa mga suspek ang pagpatay sa mayor. Kini human nakalingkawas sa pag ambush ug namatay gani ang iyang bana ug duha nila ka mga kauban.
Atong hangyo sa mga pulitiko ipatigabaw ang kalinaw sa eleksiyon. Ang kahakog sa gahum di maayong bugtian ug kinabuhi. (Email: efrenlonzon@gmail.com Text: 09235562777)