ORMOC City, Leyte - Hapit na mahuman sa Department of Public Works and Highways (DPWH) 4th District ang ilang tanang mga proyekto sa 2018.
Matod ni DPWH District Engr. Lino Francisco Gonzales, naa na sa 96.4 porysento nga nahuman ang mga proyekto nga gipundohan sa DPWH alang sa 2018.
Prayoridad ning pundo mao ang rehabilitasyon sa mga karsada ug tulay lukop kwatro distrito sa Leyte.
Sa karon, naa na sa 95 porsyento nga nahuman ang road and bridges rehabilitation.
Samtang 96.99 porsyento nga nahuman ang proyekto alang sa flood control.
“Right now, we are 95 percent complete sa roads and bridges and 96.99 percent sa flood control. Karon kay di naman mag sige og uwan, amo gipaniguro nga 100 percent completed na ang mga proyekto,” matod ni Gonzales.
Ang DPWH nagahinan og P3.3 bilyones nga pundo sa 2018 alang sa mga road, bridges ug flood control projects.
Gawas niini, nihatag usab ang Department of Education (DepEd) og P307.7 milyones nga pundo aron ikatukod og classrooms sa una pa ang klase.
“We are 99.34 percent na sa classrooms construction sa district. Gamay na lang og kuwang kumpleto na,” matod ni Gonzales.
Ang Department of Agriculture nihatag usab og P18 milyones alang sa farm to market roads samtang P30 milyones naman gikan sa National Disaster Risk Reduction and Management.
“But bisan og pabor na ang panahon karon kay sige nangg init pero naa sab ta malangay sa laing aspeto sama sa road-right-of-way ug kining mga permit like sa DENR kay dapat man sab mi mo comply” pasabot ni Engr. Gonzales.
Karong 2019, gilauman sa ilang buhatan ang binilyon nga kantidad na usab nga mga proyekto. (JKDP)