CALBAYOG City, Samar - Duha ang patay samtang pito ang samdan sa nahitabong karambola ug tinigbasay sa duha ka mga pamilya ning siyudad gumikan sa kasungian sa yuta.
Kini nahitabo sa P5, Tinambacan Norte, alas 10:30 sa buntag, Lunes, Mayo 6.
Base sa report sa kapulisan, ang mga biktima giilang mao sila si Renato Velasco, Terry Walker, Romeo Velasco Sr, Romeo Velasco Jr. ug Joshua Velasco.
Mga suspek giila sa kapulisan nga mao sila si Vicente Labonite, alyas ‘Tatik’, Mario Sayson, Helen Labonite, ug Angelo Jabonero.
Base sa imbestigasyon, giguba ni Velasco Sr. ang usa ka koral nga kawayan gumikan sa ilang kasungian sa yuta tali sa mga suspek.
Nanangasuko ang mga suspek, ilang gitigbas si Velasco Sr. hinungdan nga nikuha usab og mga sundang ang mga Velasco ug ningbawos.
Niresulta kini sa tinigbasay sa isig ka habig. Matod sa mga pulis, mga Labonite ug Jabonero ninggamit og alibre .38 nga revolver ug sumpak sa pagpamusil sa mga Valesco.
Nangamatay diha diha ang duha ka mga biktima nga sila si Renato ug Terry samtang ang uban nangaangol. Gipangdala ang ubang mga Velasco sa tambalanan human sa insidente.
Kasungian sa pamilya ug yuta ang gitumbok sa kapulisan nga motibo sa duguon nga insidente.
Narekober sa kapulisan ang usa ka kalibre .38 nga revolver, usa ka sumpak, duha ka mga sundang ug usa ka kutsilyo.
Naa na sa kustodiya sa kapulisan ang tanang mga suspek.
Kaso nga ipasaka giandam na sa kapulisan batok sa mga suspek.