NA-RESCUE sa mga sakop sa Gun-ob Police Station sa Lapu-Lapu City Police Office LCPO ang duha ka mga menor de edad nga mga lalake sa ilang buybust operation sud sa usa ka subdivision sa Brgy. Babag, Dakbayan sa Lapu-Lapu niadtong Lunes sa gabii, Mayo 6.
Ang mga menor de edad nga nagpangedaron og 15 ug 16-anyos maoy subject sa operasyon sa kapulisan ug giingong nalakip sa LCPO drug watchlist.
Nakuhaan sila og walo ka mga gagmay ug usa ka medium nga pakete sa gituohang shabu sa ilang posisyon.
Lakip sa nakuha ang P500 ug mga drug paraphernalia nga gamiton usab sa pag-repack og mga shabu.
Matod ni Police Senior Master Sergeant Jeofrey Managase sa Gun-ob Police Station nga ang duha ka mga menor de edad taod-taod na nga gipanid-an sa kapulisan kay kanunay molutaw ang ilang mga ngalan niini gikan sa ilang mga dinakpan.
Mismo sa panimay sa 15-anyos nga na-rescue nahitabo ang transaction tali sa nagpaka-aron ingnong poseur buyer.
Dako ang pagtuo sa kapulisan nga posibleng kompiyansa ra ang mga menor de edad nga di sila maka-operate sud sa usa ka subdivision.
“Estudyante ning duha pero mogawas man gud ila pangalan matag naa tay dakop. Mao tan-awonon pa ron nato kinsa ning ilaha amo gyud ug kinsa ning nagpaluyo nila,” matod ni Managase.
Gi-turnover na ang duha ka mga menor de edad sa sa kustodiya sa Homecare Center sa Brgy Gun-ob.
Gikatakda silang pasakaan og kasong kalapasan sa Republic Act 9165 kun paghupot ug pagpamaligya og ginadiling drugas.
Ang Department of Social Welfare and Development (DSWD) na unya ang mohukom kon duna bay discernment ang kaso nga ipasaka sa kapulisan batok sa duha ka mga menor de edad.
Mga menor nga makahimo og krimen gikan sa 15-17 anyos nagkinahanglan og psychological evaluation sa di pa ipasaka ang kaso. (GCM)