HUMAN makaangkon og temporaryo nga kagawasan, motambong og conference si San Francisco Bise Mayor Alfredo “Al” Arquillano Jr. didto sa Bali, Indonesia karong Hunyo 26 hangtod sa 30.
Ang conference, matod niya, kabahin sa moral education ug ang tinguha nga ma-mainstream ang values sa edukasyon sa kabataan sa mga tunghaan.
“Kay karon gud nawa naman ang good manners and right conduct, daghan na kaayo og kuan. Wa na siya matagai og focus so, dapat lang mao say angay ma-in place sa atong mga kabataan, kay di naman nimo mausab og dako na, dapat sa gamay pa ato nana isilsil,” sumala sa bise mayor dihang nahinabi sa Superbalita Cebu.
Ang global conference gipasiugdahan sa United Nations Educational, Scientific and Cultural Organization (Unesco) nga usa ka specialized agency sa UN nga nagbase sa Paris.
Sigon ni Arquillano tukion sa kalihokan kon unsa ang edukasyon sa pagkab-ot sa 17 ka Sustainable Development Goals (SDGs) nga gitakda sa United Nations.
Siya nidugang nga iyang nabati nga responsibilidad niya nga ipaambit ngadto sa uban ang iyang mga nakat-unan ug nahibaw-an sa lainlaing mga conference nga iyang natambungan sa ubang mga nasod.
Si Arquillano giimbitar usab sa UN nga mamulong labot sa disaster risk reduction sa pagpatuman sa Sindai framework didto sa Geneva, Switzerland, karong Mayo 13 hangtod sa 15.
Apan di siya makatambong niini gumikan kay naatol usab nga eleksyon dinhi sa nasod sa Mayo 13 diin nidagan siya pagka mayor sa ilang lungsod sa isla sa Camotes.
Niadtong Mayo 2, naangkon ni Al ug sa iyang manghod, San Francisco Mayor Aly Arquillano ang ilang temporaryo nga kagawasan human tugti sa korte sa siyudad sa Danao nga makapiyansa og P750 mil alang sa mga kasong illegal possesion of firearms ug hand grenade nga gipasaka sa kapulisan batok kanila.
Giingong nakuhaan sila og mga armas de fuego ug granada atol sa usa ka operation. (SCG)