GITAPOK ang electoral board members (EBM) sa Lapu-Lapu City alang sa final ug refresher training nga gipasiugdahan ni Attorney Reiner Layson, city election officer, agi’g pagpangandam sa May 13 election.
Gipa-ubos na sa full alert status ang dakbayan, sugod kagahapong adlawa, Mayo 7.
Ang Mactan Electric Company (MECO) misusi na sa matag tunghaan ilabi na sa ilang electrical facility aron kalikayan nga mahitabo ang power interruption atol na unya sa piniliay.
Moabot sa kapin sa 1,100 ka electoral board members ang gipa-ubos sa final training nga gibahin sa duha ka batch.
“They are reminded of their (EBM) duties and functions on election day on the protocols for the operations of the vote counting machines (VCM),” tipik sa pamahayag ni Layson.
Matod pa sa opisyal nga sagad sa mga magtutudlo pulos na nakasuway sa paggamit sa VCM ug 10 porsento lang kanila ang mga first timers.
Iyang gipahibawo nga ang Lapu-Lapu adunay 23 ka mga extra o contingency VCM nga magsilbing back-up.
Adunay 25 ka mga E-jeep ang gi-request ni Layson nga magamit sa ilang mobility/transport sa equipment o personnel ug ang lima niini ipadala sa Olango island.
Gipahinumduman sab ni Layson ang matag watchers sa nagkadaiyang partido nga bisan pa man gitugotan nga makadala og cellular phone sud sa polling precinct apan gidili ang pagkuha og hulagway sa balota nga aduna nay marka ilabi na ang pagtutok sa camera ngadto sa botante nga nag-fill up sa balota.
Si P/Colonel Limuel Obon, hepe sa city police office, mibutyag nga nagtigum na sab sila sa tanang station commander lakip na sa representante sa Philippine Air Force ug Philippine Navy alang unya sa deployment sa mga sakop sa nagkadaiyang polling precinct sa mainland ug isla sa Olango.
Sa laing bahin, si Dianne Amodia, communication officer sa MECO, nipahibawo nga gimonitor nila ang mga transformer aron kalikayan nga adunay overload sa gamit niini nga usa sa hinungdan nga adunay power trip-off.
Gilakip sab sa pagsusi ang electrical wiring o facility sa matag tunghaan. (FVQ)