ANG Regional Trial Court (RTC) Branch 10 ni-dismiss sa kasong gipasaka sa minority bloc sa Cebu City Council batok ni Mayor Tomas Osmeña ug mga konsehal sa administrasyon gumikan sa gitawag og forum shopping kalabot sa joint venture agreement (JVA) tali sa Cebu City Government (CCG) ug Universal Hotel and Resorts Incorporated (UHRI).
Ang miniority bloc pinangulohan ni Konsehal Joey Daluz nisang-at og declaration of nullity with urgent prayer of 72 hour temporary restraining order (TRO) writ of preliminary injunction (WPI) para mapa way bili ang pagpirma sa JVA.
Apan si Judge Soliver Peras nihatag og gibug-aton sa argumento sa depensa nga ibasura ang maong kaso sanglit adunay pending nga kaso sa RTC Branch 23 sa sala ni Judge Generosa Labra kinsa unang nihukom nga valid ug legal ang Sangguniang Panlungsod (SP) resolution nga nagtugot kang Osmeña pagpirma sa JVA uban sa UHRI.
Ang kaso nga gisang-at ni Lopez gibasura na sa Branch 23 apan niduso sila og motion for reconsideration nga hangtod karon wala pa maresolba.
“This Court hereby resolves to dismiss the instant petition for declaration of nullity with urgent prayer for issuance of a 72-hour temporary restraining order and /or writ of preliminary injunction,” tipik sa decision ni Peras niadtong Mayo 2 sa kasong gisang-at niadtong Septyembre 19, 2018.
Ang minority bloc nisang-at og kaso aron pag-kwestyon sa resolution nga nagtugot lang kang Osmeña nga makapirma sa JVA sanglit ang opposition nangangkon nga na-adjourn na ang session niadtong tuig 2018.
Apan ang mayoriya mibutyag nga ni-resume sila niadtong higayona ug wala maundang ang session.
Si Peras niingon nga sa RTC Branch 10, ang petitioners mao sila si Daluz ug laing pito ka opposition, samtang sa Branch 23 bugtong si Kagawad Amilo Lopez sa barangay Busay ang bugtong reklamante.
“Petioners have a shared identity of interest. They are not suing in their personal capacities but in their capacity as public official and taxpayers. Their common interest is based on their political stand,” dugang ni Peras.
Ang kasong gisang-at sa duha ka petitioner adunay managsamang tumong para dili ma-consume ang JVA tali sa CCG ug UHRI.
Ang respondents usab sa duha ka kaso sa managlahing sala pulos CCG ug UHRI. Tuyo sa reklamo nga dili mapadayon ang P18 bilyones nga pag-develop sa Kawit Island.
Dugang ni Peras nga ang pagdugang sa petitioner og mga respondents sa Branch 10 diin ang mga konsehal sa majority bloc giapil og kiha dili makausab sa kamatuoran nga ang kaso sa duha ka korte adunay parehong grupo nga mao ang CCG, UHRI ug samang SP Resolution ang gibasehan.
Si Cebu City Legal Officer Joseph Bernaldez niingon gumikan sa desisyon sa korte, ang CCG ug UHRI makahimo na sa ilang gustong buhaton sumala sa JVA pag-develop sa 10 ka ektaryang luna sa nahisgutang isla.
“Padayon ang maong proyekto kay wala man sila maka-secure og TRO ug injunction kay gi-dismiss man ang ilang kaso,” pasabot ni Bernaldez
“Ever since pa bisan naa ang kaso wa man gyuy matawag nga legal hindrance kay wala may giisyu ang Branch 23, TRO ug WPI unya apil ang Branch 10 wala say giisyu so walay makapugong sa proyekto, padayon gihapon.”
Si Mayor Tomas Osmeña atol sa miting de avance niadtong Dominggo niingon nga kon mahuman na ang Isla De La Victoria, ang kasikbit nga luna diin nagbarog ang dakong mall mahimo na nga urban poor. (PAC)