NAHIMONG hugyaw ug puno sa papremyo ang natigayong Employees Day sa SunStar Davao Publishing Inc., niadtong Sabado, Mayo 4, didto sa Island Garden City of Samal (Igacos), probinsya sa Davao del Norte.
Makita sa dagway sa mga empleyado ning kompanya ang kasadya nga sa bisan gamay nga higayon nakalulinghayaw uban ang mga katrabaho gikan sa upat ka departamento niini.
Ang nindot kaayo nga Vanishing Island sa Samal maoy unang girumbo sa grupo nga maoy rota sa island hopping diin didto natigayon ang sack race nga sarang gikalingaw sa mga empleyado.
Human sa dula, siyempre giingong “mandatory” ang selfie ug groupie photos agi’g handumanan sa maong okasyon.
Uban sa lamian nga pagkaon sa paniudto samtang sakay sa motorized banca padulong sa Canibad, Samal eksayted na sab ug didto na sab natigayon ang mga padula nga gikahimut-an sa tanan.
Linibo ang nadag-an sa duha ka grupo nga gikalipay sa tanang empleyado.
Ang maong okasyon regular nga ginahimo sa SunStar Davao Publishing Inc., agi’g paghatag og pasalamat sa tanang empleyado sa maong kompanya matag Labor Day.