SUKAD pa kaniadto, layo kaayo ang akong kasing-kasing sa mga buluhaton nga dali ra kaayo ang kwarta sama pananglit sa pagbisita sa mga opisina sa politiko ug opisyales sa gobyerno nga kusog motunol human sa interbyu.
Kini tungod kay supak sa akong kabubut-on ug duna kami gipanumpaan nga Oath of Journalistic Professionalism sa kompanya nga akong gialagaran.
Panahon sa milabay nga eleksyon, makadaghan na ako gihangyo sa mga politiko ug ilang mga bata-bata nga mahimo nilang tigdepensa, apan ako kining gibalibaran gumikan sa mga naunang hinungdan.
Hinuon, dunay higayon nga gipaagi sa ilang mga bata-bata ang ilang giingon nga “pangkape”, apan sa pagkatinuod akong gi-donar sa simbahan nga napangalan sa politiko ug pagkahuman akong itunol kanila ang pruweba sa donasyon.
Mao kini ang hinungdan nga hangtud karon kining inyong ubos nga higala pobre lang gihapon.
Networking
Samtang nagtungha pa ako sa kolehiyo, daghan nang higala ug kauban nako sa trabaho sa gobyerno nga nag-imbita nako nga mosud sa ilang negusyo nga networking mao nga niapil sab ko sa ilang mga business meetings.
Ug kay gikinahanglan man lagi nga mo-invest sa networking sama sa pagkapital sa produkto ug brochure, dali kaayo kong molikay sa presyur tungod kay di ako makatugot nga ang mga sama nako nga pobre nga higala mabiktima ug motaas ang blood pressure.
Ako sab dayon gipanaminan ang akong mga kaila nga hangtud karon sige lang og panghambog nga nadatu tungod sa ilang networking nga negusyo.
Investment scheme
Sa kanunay nako nga pag-adto-nganhi sa among probinsya sa Surigao del Sur, daghan kaayong kabanay nga nag-engganyo nga mo-invest kuno sa ilang relihiyuso nga grupo.
Dali ra tinuod ang kwarta kay hinambid, inom, ug sugal ra ang trabaho pero matag buwan pirmi kobra ang mga maldito.
Sanglit kay wa man lagi ako mibubo sa ilang negusyo, gikantiyawan ko nila nga di gyud mamilyonaryo. Ug ako sab silang giingnan nga malipay nako nga makita mo nga mamilyonaryo.
Ako man gud nakita nga sa pagsugod pa lang di na maayo tungod kay, base sa ilang mga testimonya ug mga buhat, sukwahi sa balaod sa gobyerno ug balaod sa Diyos kay bisan pa sa mga advisories sa Securities and Exchange Commisssion (SEC) sama sa cease and desist order ug revocation sa ilang registration, padayon sila sa ilang operasyon.
Vote buying
Sagad sa akong madungog, naghulat sila kung kinsa ang mga politiko nga mamalit sa ilang boto. Ug kay may pagkahilabtanon ko, ako silang giingnan nga di nako ibaligya ang boto kay kini sagrado mao nga di ko tigpaskin sa Facebook sa ngalan sa akong mga kandidato.
Sa tanang panahon, I don’t aspire to make a living, but I aspire to make a difference.