Editoryal: Katuohan o dili?

ANGAY lang nga di magdali ug susihon una pag-ayo ang kredibilidad sa nitumaw nga si Peter Joemel Advincula nga nagpaila nga maoy “Bikoy”, nagpaluyo sa nag-viral nga video nga naglambigit sa pamilya ni Pangulong Rodrigo Duterte sa ilegal nga druga.

Si Advincula nipatim-aw niadtong Lunes ug niatubang sa media sa buhatan sa Integrated Bar og the Philippines (IBP) sa Pasig City aron angkunon nga siya ang naa sa likod video batok kanila ni Presidential son Paolo Duterte, Manns Carpio, umagad nga lalaki ni Pangulong Duterte ug kanhi Special Assistant to the President (SAP) Bong Go.

Gani ang IBP mismo, niangkon nga wala pay kasegurohan nga makakuha og libre nga legal assistance gikan sa ilang han-ay si Advincula human nga nagpatabang kini kanila.

Sayo niini, gisulti ni Go nga iya nang natubag ug gihimakak ang alegasyon ni Advincula kaniadto pa nga nalambigit siya ug pipila ka miyembro sa pamilyng Duterte sa ilegal nga druga.

Giklaro ni Go nga wa siyay tattoo sa likod sukwahi sa gialegar ni Advincula, kon diin subli niya kining gipamatud-an pinaagi sa paghubo sa iyang t-shirt atol sa gihimong press conference sa Calamba, Laguna niadtong milabay nga adlaw.

Una na sab nga gihimakak ni Presidential son Paolo Duterte nga duna siyay tattoo nga porma og dragon sa iyang likod atol sa gihimong senate hearing sa milabay nga tuig base sa alegasyon ni Senador Antonio Trillanes.

Ning bag-o, gihagit ni Paolo si Advincula nga kon duna siyay igong ebidensiya, pasakaan sila og kaso ug di lang kutob sa istorya.

Tinuod, daghan pa gihapon ang nagduda sa tayming ni Advincula ning iyang pagtumaw karon gumikan kay nagsingabot nga eleksiyon.

Gani, dunay nagtuo nga posibleng dunay mga inilang mga politiko ang nigamit kaniya aron nga dauton og maayo ang imahe sa pamilya ni Pangulong Duterte.

Kay kon seryuso si Advincula sa iyang mga alegasyon batok sa pamilyang Duterte, dugay na unta siyang nigawas ug mopasaka og kaso batok kanila.