NAMATAY ang usa ka 43 anyos nga ginang niadtong Dominggo, Mayo 5, mga duha ka adlaw human siya giingong kulataha ug lapwai og init tubig sa iyang kapuyo sulod sa ilang balay sa sitio Good Shepherd Banawa, Barangay Guadalupe, Siyudad sa Sugbo.
Wa unta mabutyag ang binuhatan sa amahan kon wa pa mosumbong sa silingan ug kapulisan ang 15 anyos nilang lalakeng anak. Ang biktima giila nga si Maria Theresa Alcoseor Umagat, adunay upat ka mga anak.
Si Umagat nakaangkon og grabeng bun-og sa lawas ug paso sa nawong human sabligi og pinabukal nga tubig sa iyang kapuyo nga giilang si Raul Micolob Quecho, 45.
Matod ni Police Captain Dexter Basirgo, hepe sa Guadalupe Police Station, nga niadto lang Lunes, Mayo 6, sila nasayod sa hitabo kay gustong itago sa suspek ang krimen.
Ang mga silingan na ang nihatag og kasayuran sa Guadalupe police nga ang kamatayon ni Alcoseor adunay foul play.
Sa pag-adto sa mga pulis sa pinuy-anan sa mag live-in, gisulod na sa lungon ang lawas ni Umagat ug gihaya na sa ilang balay.
Ang anak nga lalake nga nagpangiradon pag 15 anyos ang nitug-an ngadto sa mga silingan nga gikulata ang iyang inahan niadtong Biyernes, Mayo 3. Gipaubos dayon sa kapulisan sa autopsy ang lawas ni Alcoseor. Nasuta nga adunay foul play ang kamatayon tungod sa nahiaguman niining mga bun-og sa lawas ug dakong paso sa nawong niini.
“Ni-request mi og autopsy kay nakita man nga naay paso ang nawong sa biktima. Gibuboan og init tubig. Maoy narration sa silingan,” matod ni Basirgo.
Matod sa imbestigador sa Guadalupe police station nga si Police Master Sergeant Ronnie Nudalo nga niadto pang Biernes sa gabii gisigihan og kulata sa suspek ang biktima, base sa sulti sa anak.
Nianang pagka Sabado, Mayo 4, luya na kaayo si Alcoseor nga naglubog sa banig.
Nianang pagka Dominggo gipukaw na unta siya sa anak, apan wa na kini molihok tungod kay patay na.
“Giimbestigar namo (ang anak), nakakita kuno ang bata nga gikulata ang iyang mama pagka Friday sa gabii sa alas 8. Pag Sabado, luya na iyang mama, naglubog sa banig. Pag alas 6 sa buntag Dominggo, iyang gipukaw, wala na daw nagtingog iyang mama,” sigun ni Nudalo.
Gidakop dayon sa mga pulis si Quecho sa dihang ilang naabtan sa ilang balay human sa autopsy ug imbestigasyon sa anak.
Matod ni Basirgo nga wa motingog si Quecho bisan giunsa nilag pangutana sa hitabo.
Kasong murder ang gipasaka sa kapulisan batok sa suspek sa Martes, Mayo 7.