MAS makabenipisyo ang mga lungsod sa Consolacion ug Cordova ning hingpit na nga pagkahimo nga lone district sa Siyudad sa Mandaue.

Kini ang panahom sa mayor sa lungsod sa Consolacion Teresa Alegado, kinsa nitug-an nga gipanglantawan na nila daan ang maong kalambuan, human nga siya mismo nitunga didto sa Kongreso sa dihang’ gidungog ang balaudnon alang sa pagkahimo nga lone district sa Mandaue City.

Gitug-an ni Alegado nga bisan siya ang naghinam-hinam alang sa maong kalambuan kay nagpasabot kini nga sila nalang duha sa lungsod sa Cordova ang magtunga unya alang sa pundo nga gipahinungod sa sixto distrito.

Nagpasabot usab kini nga mas matutukan unya sa mamahimo nga kongresista, human unya sa sunod nga national election sa 2022, ang paghatag og mga proyekto sa Consolacion ug Cordova.

“Ako wala koy pagsupak. Kay ngano, it will also be an opportunity for our towns to be able to face the good, in terms of funding from the national government. Kay kon unsay budget sa 6th district bahinan man sa Consolacion, Mandaue and Cordova. So paninglitan kon ma-separate district na ang Mandaue, separate sad mi, murag daku-daku na mi og pahak, daku na og mabuhat, sa amo pud makahimu na mi og dagkong proyekto kay additional naman na naa,” pagpasabot ni Alegado sa Superbalita Cebu.

Dugang niya nga ang Sugbo ang entitled nga adunay kapin sa napulo ka distrito, ug mas maayo nga daghan ang morepresentar sa Sugbo ngadto sa kongreso, aron mas madungog ug matutukan kon unsa ang problema sa matag lugar.

“Unya sa Cebu, we are supposed to be entitled for more than 10 districts sa tinuod lang. But wala lang kaayo nitan-aw ba nga buakon ang ilang distrito. Maayo man gud buakon, masilbihan ang constituents in terms of their needs and in terms of projects coming from the national government,” dugang ni Alegado.

Gipasabot usab ni Kongresista Jonas Cortes nga sulod na sa 112 ka tuig nga pabiling walo ra ang distrito sa Sugbo.

“Since 1907 panahon ni Don Sergio Osmeña ang distrito sa Sugbo pito ra, 112 year na ang nilabay gamay ra ang niumento, I think ideal is 14 to 15 district, para nako angay na kaayo. As we look at the picture, para nako, the more the better,” pagpasabot sa kongresista.

Eversley

Mapasalamaton usab ang kongresista nga dungan sa balaudnon nga mahimong lone district ang Mandaue City, lakip sa napirmahan ni Presidente Rodrigo Duterte nga balaudnon mao ang Republic Act 11273 nga expansion alang sa bed capacity sa Eversley Childs Sanitarium and General Hospital.

Kini gikan sa 50-bed capacity ngadto na sa 200-bed capacity. Gikatakda nga sa sunod tuig malakip na kini sa mapunduhan.

“I am happy to announce the expansion of services of the Eversley hospital.." pahayag ni Cortes. (FMD)