NAUGDAW ang tibuok panimalay sa usa ka konsehal sa siyudad sa Cagayan de Oro human nasunog niadtong Mayo 7 mga alas 6:25 sa gabii sa Vamenta Street, Barangay Carmen, siyudad sa Cagayan de Oro.
Mokabat ngadto sa usa ka milyon ang natalang damyos sa panimalay nga gipanag-iyahan ni Konsehal George Goking lakip na ang buhatan sa Cagayan de Oro Power and Light Company (Cepalco) ug Birdies and par shops.
Sa pakighinabi kang Chris Goking, giingong nakurat na lamang ang amahan niini sa dihang dunay kalayo sa pagsarado sa pultahan ug gisulayan pa sa pagpalong apan dako na ang kalayo, hinungdan nga nigawas na lamang kini.
“Pagsira gyud niya sa pultahan nibuto man daw. Wiring man daw naa daw apoy gadagan sa atop. Di naman daw matabang sa fire extinguisher. Nigawas nalang sila. Tibuok gyud balay,” matud ni Goking.
Gidugang pa nga nagpasalamat na lang usab si konsehal Goking gumikan kay luwas ra usab sila.
Giingon nga ang maong panimalay mag-unom na kini ka dekada ug sa ila pa kining mga katigulangan nga natukod niadto pang tuig 1960’s.
Gitutokan karon sa tinugyanan sa Bureau of Fire and Protection (BFP)-Northern Mindanao nga si Senior Fire Officer 3 Samson Velarde, hepe sa BFP sa fire station sa Carmen.
“Ang taas nga possibility electrical ignition maoy taas nga anggulo nga atong gitutokan,” matud ni Velarde.
Nasayran nga nakadawat og tawag mga alas 6:25 sa gabii ang tinugyanan sa BFP ug nakontrol ang kalayo mga alas 7:00 ug gideklara kining fireout mga alas 8:20.
Padayon pa ang imbestigasiyon karong mga panahona aron masuta kung unsa ang tinubdan sa kalayo.
Nagpahimangno usab ang tinugyanan sa BFP nga magbinantayon ang tanan ilabi na sa grabeng nasinatian nga kainit sa panahon.