KASINA ang gituohang motibo pagpusil patay sa usa ka head guard niadtong Mayo 7 mga alas 7:30 sa gabii sa planta sa PEPSI Cola, Barangay Agusan, siyudad sa Cagayan de Oro.
Patay ang head guard nga si Christopher Erana, 41, minyo nga taga Purok 17, Sampaguita, Armac, Iligan City, ubos sa All Nation Security Agency, samtang ang suspek naila nga si Joy Cabahug, 45, minyo, guwardiya ug residente sa Block 32, Lot 32, MDMU Danao Patag, Opol, Misamis Oriental.
Sa nahipos nga impormasiyon gikan sa Police Station 6 (PS6) sa Puerto ubos kang Police Major Alim Sumandar, nasayran nga nasikop si Cabahug sa hot pursuit operation sa highway sa Barangay Agusan human misulay sa pagsibat mga alas 8:30 sa gabii sa susama nga adlaw.
Nasayran nga samtang nag-guard mounting si Erana, giingong nagkabangi ang duha nga miresulta sa pagpamusil sa makadaghang higayon ni Cabahug gamit ang 9mm nga armas.
Nasayran nga dunay personal nga bangi ang duha.
Gibutyag usab sa kaipon ni Erana nga dugay na nga nagdumot si Cabahug sa iyang kaipon bisan pa man nga wala pa kini nahimong head guard. Giingong dako ang pagdumot niini ug kasina diha sa trabaho diin nga igo lamang nga nagtuman sa trabaho si Erana ug nagtuman sa polisiya sa kampanya.
Gidugang pa nga nakadawat na kini og bahad sa kinabuhi gikan ni Cabahug.
Ang maong suspek ang kasamtangang nagtingkagol sa mini-cell sa Police Station 6 sa Puerto aron sa pag-atubang sa posibleng kaso nga ipasaka batok niini.