LIMA ka adlaw na lang ang nabilin usa ang eleksiyon, daghan ug nagkadautan ang mga pagpanglingla sa uban aron bugnawon ang pagbati sa mga suporter sa pagboto sa ilang mga kandidato.
Ang isyu sa Bikoy video gituohan nga gipaluyohan sa mga kontra partido sa administrasyon aron dauton ang kridibilidad ni Presidente Rodrigo Duterte ug sa iyang pamilya nga nangunay pagpangampanya alang sa ilang mga kandidato nga kasagaran apil sa mga nag-una sa survey sa mga dumadaug sa eleksiyon.
Palpak ang gipadayag sa nagpaila nga si Peter Joemel Advincula nga siya si Bikoy, scanner ug encoder kuno kanhi sa sindikato sa druga sa iyang akusasyon nga dunay tattoo nga dragon si Christopher “Bong” Go sa likod nga ilhanan sa iyang pagka-miyembro sa sindikato sa druga. Bisan badlis nga wati walay nakulit sa likod ni Bong Go dihang mihukas sa iyang sinina ug mipakita sa kamera. Ang maong akusasyon mao sab ang gipasiatab ni Senador Antonio Trillanes nga tigpaghot sa pundok sa oposisyon.
Kon kanta pa ang gihimo ni Advincula, makaingon ko nga dili niya kabisado ang mga linya o garay kay masabot sa iyang pagbasa nga wala sa kasing-kasing ug nasisil sa alimpatakan, masabot nga igo ra aiyang nagbasa.
Tataw nga pareha silang iro ni Trillanes kay pareho sila’g pinaghutan. Birds with the same feather ra sila.
Bisan sa mga pangulipas sa taga simbahan nga wala sila nagapaluyo pagkontra sa kasamtangang administrasyon ug kanunay naga ingon nga dunay pagkabulag sa simbahan ug sa gobyerno, makita nga sila nagasuporta sa pagpahugno sa liderato ni Presidente Duterte. Mga madre ang nagadepensa ug naghatud kang PJ Advincula sa buhatan sa Integrated Bar of the Philippines (IBP) didto sa Pasig. Usa kini sa hinungdan nganong kanunay maapil sa yawyaw ug balikas sa Presidente ang mga pari sa simbahan kay mag-apil-apil man.
Naga-ingon mo nga hugaw ang politika ug kasagaran sa politiko mga tikasan kon dili man ang tanan, nan, nganong kamo nga mga naa sa pulpito mag-apil-apil man sa dula sa mga dautan?
Sa akong yano nga pagsabot mas napalig-on sa mga kandidato sa administrasyon ug mas midaghan ang motuo kanila tungod hugaw pa sa trapo ang gigamit nga instrumento sa kaatbang aron hugnuon ang ilang kasamtangan nga estado kay daghan ang mitumaw nga mga biktima ni Advincula AKA Bikoy nga iyang gipanguwartahan sa nakalabay nga panahon.
Ang akong pangutana, unsa may inyong napala karon? Inyong pinturahan og itom ang inyong kaatbang aron kunohay puti mo lantawon?
Katawhan ang maghukom ug paabuta ninyo sa Lunes puhon.