MITUGPA sa Sta. Ana Police Station ang duha ka mga babaye human nagdumog, Martes sa buntag, Mayo 7, sa Barangay 15-B, Obrero, Davao City.
Usa ka Liza (bansagon gitago), 37-anyos, ang daw mora’g tigre kaisog dihang iyang nasakpan ang iyang kapuyo nga nakighalok sa kabit didto sa usa ka establisyemento sa Obrrero.
Nanghuboy ang mata sa usa ka Merlyn, 24-anyos, ang giingong kabit sa kapuyo ni Liza human niya kini giayo’g sumbag ug gibugno sa trabahoan.
Una niini, gisundan ni Liza ang iyang kapuyo nga si Roger kay natahap kini sa pipila ka semana nang daw walay gana sa ilang relasyon.
Didto gipanid-an ni Liza ang lihok sa iyang kapuyo ug niadtong Martes iya kining gisundan.
Daw gitabunan sa langit ug yuta si Liza dihang iyang nakita nga gihalukan sa iyang kapuyo si Merlyn sa pag-abot niini sa trabahoan.
Walay duha-duha nga mikompronta si Liza ngadto sa duha ug gilayon niyang gibugno si Merlyn ug giayo’g sumbag ang duha ka mata nga miresulta sa pagpanghubag niini.
Sa impormasyon nga nakalap sa SuperBalita didto sa kapulisan sa Sta. Ana Police Station nga nahimo ni Roger ang pagpangabit human wa na siya ganahi sa iyang kapuyo kay giingong usahay di na kini mag-ilis og panty.
Depensa ni Liza nga naabtan sa SuperBalita dihang mikuha sa kopya sa iyang blotter nga, “Unsay di mag-ilis og panty, kalimpyada nako, kanang iyang kabit ang hugawan,” ingon ni Liza.
Ang kapulisan sa Sta. Ana PNP nagmandu nga ihandos nila ang kaso sa barangay level aron didto sila mahusay.