Gipanglubong
GIPANGWISIWISI sa host Toronto Raptors ang bisitang Philadelphia 76ers, 125-89, kagahapon sa Game T5 aron pagposte og 3-2 nga bintaha sa ilang Eastern Conference semi-finals series sa National Bsaketball Association (NBA) 2019 Playoffs.
Human sa sikit nga kombati sa 1st quarter, balanseng ataki ang gihimo sa Raptors aron sugdan pagkitkit ang 76ers hangtod nga nakaposte sila og 64-43 nga labaw sa halftime.
Nagpadayon ang kabangis sa Raptors ug nahingpit nila ang ilang dominasyon hangtod na sa katapusang gutlo.
Gumikan kay kontrolado sa Raptors ang duwa, hayan nakakita sila og saktong kahigayunan aron papahuwayon ang ilang labing pambato nga si Kawhi Leonard og taas-taas nga oras.
Unom ka mga magduduwa sa Raptors ang ningmugna og dobleng numero nga puntos pinangulohan ni Pascal Siakam, kinsa nagpakatap og 25 puntos.
Si Leonard, kinsa nag-average og 33 puntos sa nag-unang upat ka mga duwa sa series, niamot og 21 puntos ug 13 rebounds una kini mibiya sa mipahuway sa nahabiling 7:22 minutos.
Niining mga gutloa, naglabaw na og 30 puntos ang Raptors, 103-73.
Si Lowry niamot og 19 puntos alang sa Raptors, nidugang og 17 puntos si Danny Green.
“Kawhi still had a great game and the surrounding cast contributed,” matod pa ni 76ers coach Brett Brown.
Nuggets 124, Trail Blazers 98
Sa Denver, gipanglampornas sab sa host Nuggets ang Portland Trail Blazers sa Game 5 aron pagkulit sab og 3-2 nga binataha sa ilang Western Conference semi-finals series.
Gipangulohan ni Nikola Jokic ang kadaugan pinaagi sa iyang 25 puntos ug 19 rebounds, nidugang og 24 puntos si Paul Millsap samtang niamot og 19 puntos si Jamal Murray.
Ning sangkaa, ang Nuggets mao ang naglabaw gikan sa sinugdanan hangtod sa katapusan.
Gisugdan sa Nuggets ang duwa pinaagi sa 7-0 run ug human niini, wala na sila motugot nga mailog sa Trail Blazers ang bintaha.
Nagpadayon ang maayong duwa sa Nuggets hangtod nga niabot pa og 31 puntos ang ilang labaw.
Ang nagkagidlay nga Trail Blazers gipangulohan ni Damian Lillard pinaagi sa iyang 22 puntos. (AP, ESL)