Talisay mosuway og labni sa P.5 M

BALIK NA: Si Kenneth Brillo, tuo, sa Mandaue City nga naapikihan sa pagtapal ni Lyle Eredera (tuo) sa Minglanilla niining aktoha atol sa semifinal game sa Mandaue City Sports Complex diin siya nasuspenso. Karong gabii mobalik na og duwa si Brillo sa Game 2 sa 3rd Cebu Governor’s Cup Inter-cities/municipalities basketball tournament batok sa Talisay City sa mao gihapon nga dapit. (Jun Migallen)
BALIK NA: Si Kenneth Brillo, tuo, sa Mandaue City nga naapikihan sa pagtapal ni Lyle Eredera (tuo) sa Minglanilla niining aktoha atol sa semifinal game sa Mandaue City Sports Complex diin siya nasuspenso. Karong gabii mobalik na og duwa si Brillo sa Game 2 sa 3rd Cebu Governor’s Cup Inter-cities/municipalities basketball tournament batok sa Talisay City sa mao gihapon nga dapit. (Jun Migallen)

MGA duwa karon:

6:30 pm. - Balamban vs. Minglanilla

8:00 pm. - Talisay City vs. Mandaue City

Ang pagsakmit sa ganting salapi nga P.5 million maoy nakulit karon sa alimpatakan sa defending champion Talisay City Aquastars sa dihang ilang sulngon ang Mandaue City Ballers karong gabii sa Game Two sa ilang best-of-three finals sa 3rd Cebu Governor’s Cup Inter-cities/municipalities basketball tournament.

Sa Game One nga gi-host sa Talisay City Sports Complex niadtong Biyernes, Mayo 3, makutas nga dalan ang gisagubang sa Aquastars una pa nila mabuntog ang Ballers, 81-76. sa kulbahinam nga panagsangka atubangan sa nagpuot nga mga dumadapig sa matag habig.

Sayo ug una nga miarangkada ang Mandaue sa first quarter ug dali dayon kining nakaposte og 14 puntos nga bintaha. Kini ubos sa pag-ayuda nila ni Gabriel Cometa nga may 22 puntos, Lemuel Gonzaga, Archie Buscay ug Paul Sungahid.

Gawas sa physical nga duwa, mitumaw ang gamayng tensiyon sa panag-engkuwentro sa tungatungang bahin sa second quarter tungod sa reklamo sa mga coaching staff sa Mandaue nga pinangulohan ni coach Gary Cortes tungod sa kuwestiyonabling tawag sa referee.

Ning higayona, hinayhinay nang gipahak ang labaw sa Ballers, ubos sa panaghugpong nila ni Jay Deiparine, Clark Ruedas ug Keaton Taburnal.

Sa third quarter na misugod sa ilang dominasyon ang Aquastars kinsa nakapahimulos sa pagkasuspenso sa sentro sa Ballers nga si Kenneth Brillo. Si Brillo nasuspenso human kini makamugna og duha ka unsportmanlike foul atol sa ilang duwa batok sa Minglanilla Archangels sa semifinal match.

Karong gabii, gipaabot nga ang presensiya ni Brillo ilabi na sa ilawom nga bahin maoy makahatag og dakong problema sa Aquastars.

Si Aquastars coach Rey Michael Gurrea nagtuo nga mohimo og dakong adjustment ang Mandaue karong gabii ug kini maoy iyang gustong gipangandaman.

“Knowing sa style ni coach Gary (Cortes) naa gyud na silay adjustment nga himuon. Labi na ni Brillo. Ang problema namo ani ron kay wala mi tarong praktis. Ambot mora man og kampante na kaayo ang mga bata. Nagtuo na siguro sila nga mao nato,” matod ni Gurrea sa interview sa Superbalita.

Kagahapon, ang mga kadagkuan sa Aquastars team daling mipatawag og meeting sa tanang mga players.

Apan sa dili pa ang Talisay-Mandaue Game 2 sa finals, laing kulbahinam nga aksiyon ang masaksihan sa dihang ilogan sa Balamban Shipbuilders ug Minglanilla Archangels ang ikatulong luna nga sugdan sa alas 6:30 sa gabii. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph