BUNTAG. Adlaw sa piliay. Taas na ang gintang sa Adlaw gikan sa sidlakan. Apan mao pay pagbangon ni Alex sa higdaanan. Dugay man god siyang nakatulog kagabii tungod sa paghunahuna kinsay pilion niyang mayor ug isulat sa balota inig adto niya sa presinto sa eskuylahan sa Barangay Concepcion diin usa siya sa natalang botante. Naglibog siya hain sa duha ka kandidato pagka mayor ang hatagan niya sa iyang boto. Si Mr. Alberto Rabusa ba nga iyang kumpare o si Kapitan Junelo Tan sa Barangay Mangga.
Kini si Mr. Rabusa bana sa ‘incumbent mayor’ nga si Pacita nga natapos na ang termino. Namayor na kini niadto sa ilang lungsod apan napupos na lang ang iyang termino wa gyuy nahimong kaayuhan. Hinapi usab kaayo ang mga empleyado kon adunay mga transaksiyon sa munisipyo. Gani, daghang katagilungsod ni Alex nga nagmulo niini. Apan kutob lang sila sa pagpanghupaw ug panaguto.
Samtang si Kapitan Tan maisip nga matarong tawo sa ilang lungsod kay labihan kamatinabangon sa mga kabos. Gani, ang ubang serbisyo sa barangay iyang gi-libre. Wala gyuy ikasaway ang katawhan kang Tan hinungdang pirme siyang nag-una sa mga survey.
Ang maong ‘background’ ni Kapitan Tan wala malilong kang Mr. Rabusa hinungdang hilom siyang namalit og boto sa kabaranggayan aron pagseguro sa iyang kadaugan.
Sa miaging gabii nagkakita sila si Alex ug Mr. Rabusa ug gani, giagda pa siya pagpanihapon sa usa ka inilang kan-anan sa lungsod. Human sa ilang pagpangaon, gitunolan siya sa kandidato og napulo ka tagmanggatos dayong ingon: “Dawata ni, Pre, ug ayaw kalimot sa Mayo 13, ha?”
“Way problema, Pre,” ni Alex nga midawat sa salapi ug daling gisulod sa iyang bulsa.
Nagkakumpare sila si Mr. Rabusa kay kini man ang gipakugos ni Alex sa iyang kamanghuran kay daan man silang managhigala. Nagkauban man god sila sa hayskol.
Apan ang kapikas ni Alex nga si Tata wala mahimuot pagkahibawo nga gihatagan siyag usa ka libo ni Mr. Rabusa.
“Nganong gidawat man na nimo? Iuli na, uy!” ni Tata pa nga nahibat ang nawong.
“Iuli? Nganong iuli man? Grasya man ni!” Kalma nga namulong si Alex.
“Grasya lagi apan nahibawo kog unsay bugti ana!”
“Hilom na lang diha. Kon di ka ni Pareng Alberto, ikaw god. Di tika pugson.”
Gitimbang-timbang ni Alex ang tanan. Dako man god siyag utang kabubut-on kang Mr. Rabusa. Dihay higayon nga nasakit ang iyang anak nga kinugos sa iyang kumpare ug kini ang miabaga sa pagpatambal. Dako ang hunahuna ni Alex pagbotar kang Alberto sa eleksiyon, apan ang iyang tanlag nagmando nga si Kapitan Tan ang pilion, kay kon kiniy modaog mapapas na ang pangawkaw ug ubang kahiwian sa munisipyo.
Paglabay sa pipila ka adlaw human sa piniliay, tataw nga nadungog ni Alex ang sibya sa radyo nga nag-ingong si Kapitan Junelo Tan ang midaog nga mayor sa ilang lungsod sa labaw nga usa ka boto lang. Nahalukso sa kalipay ang iyang asawa ug mga anak. Apan si Alex nahasol kay nakasaad siya kang Mr. Rabusa sa dili paghatag sa lain sa iyang boto pero di niya mapiog ang hulhog sa iyang konsensiya busa maoy nasulat niya sa balota ang ngan ni Kapitan Tan. (KATAPUSAN)