DILI kaayo ko hilig og reunion. Dili ni sa ingon nga di ko uyon sa ideya nga magtapok balik ang mga karaang managhigala human sa pila ka tuig nga wa nagkita.
Naay mga reunion nga kinahanglang tambongan, sama anang reunion sa mga immediate nga membro sa pamilya kay naa tingali importanteng mitingan, sama anang naay namatay, naay nakapatay, naay kaslon, naay nabuang sa bisyo og kinahanglang luwason, naay yuta nga bahinon, o naay away sa managsoon nga angayng sulbaron.
Pwede pud kanang magtapok ang mga membro sa pamilya kay pista, adlaw sa minatay, semana santa, pasko, birthday ni mama’g papa, death anniversary sa pinanggang iro nga naligsan.
Mao ni mga regular nga panagtapok nga matawag gihapon og reunion. Uyon ko ani nila.
Uyon pud ko anang reunion sa managsuod nga barkada. Hangtod karon magtapok gihapon mi sa akong barkada sa high school matag tulo ka tuig. Mga napulo mi kabuok kapin kun kulang. Ang among kasuod molabaw pa usahay sa managsoon.
Bisan og asang dapita na ang uban namo gipadpad sa kapalaran, gahinan gihapon namog panahon ang among reunion. Mao ni panagtapok nga dili nako sipyaton.
Ang di ko komportable kanang reunion nga kuridas, haros tanan. Kana bang kinahanglan kang motambong tungod kay automatic membro ka ana nga grupo, sama anang batch mates.
Kapila na ko nakadawat og imbitasyon nga mag-reunion kuno among batch sa high school. Batch - pasabot, tanang lima ka sections sa fourth year. Wa man gani ko kasag-o sa mga ngan ug dagway sa kadaghanan sa among section, batch na hinuon?
Unsa nga “reunion” ang hisgotan nga wa man mi nahimong “union” sa una pa?
Apan sa ako nang giingon sa taas, wa ni nagpasabot nga way ayo ang ideya nga reunion. Akoa ra ni. Sa iningles pa, it’s not you, it’s me.
Tungod lang tingali ni sa akong pagkamanggiuwawon. Motuo mog sa dili, naay mga sitwasyon
hangtod karon nga magpangita gihapon ko sa akong mama aron motago sa iyang saya tungod kay mauwaw ko sa mga tawo.
Ingon ini na ko sa elementary pa. Maihap ra tingali sa tudlo ang matawag nakog suod sa
bata pa ko ug hangtod karon. Kahibawo ni sila kinsa sila kay parehas mi tanan, palainom.
Mao nga sa pag-reunion sa among grade six class sa miaging semana, wa ko mitambong. Gawas pa, labihan nakong huboga pagkagabii, human na ang reunion sa akong pagmata.