SUPERBALITA CEBU

Barrita: Vote-buying na sab?

Tipik sa Balaod

SA UMAABOT Lunes, Mayo 13, mid-term elections na. Katapusan hunat karong semanaha sa mga kandidato, ilabi na sa eleksyong lokal, sa ilang kampanya. Ug sa pipila ka mga adlaw sa di pa ang eleksyon, kinamangay na, pinalitay na sa mga boto.

Ang mga botante nangandam na. Usa ka byuda nga nakadungog nga kinamangay na, natug nga way panty. Pagka-ugma, nireklamo siya. Matod pa niya, “Ingon sila kinamangay na gabii, wa man lagi.” Tubag sa mga silingan, “Tingali giagian lang ka.”

Laing botante nakadungog sa wali sa pari nga nag-ingon nga ang kuwarta sa mga politiko nga ipalit sa boto usa ka dakong insulto ngadto sa mga botante. Mao nga sa sayo sa buntag sa adlaw sa eleksyon niingon siya, “Mga kandidato, hain na man ang inyong dakong insulto?”

Ang vote-buying kun pagpamalit og mga boto gidili sa balaod. Apan sama sa ubang mga balaod, ang mahinungdanon mao ang pagpatuman niini. Ang mga botante kansang mga boto gipamalit di moreklamo. Labaw nang di moreklamo ang mga kandidatong namalit og mga boto.

Ang Sec. 261 sa Omnibus Election Code nga nagkanayon, - The following shall be guilty of an election offense:

(a) Vote-buying and vote-selling. - (1) Any person who gives, offers or promises money or anything of value, gives or promises any office or employment, franchise or grant, public or private, or makes or offers to make an expenditure, directly or indirectly, or cause an expenditure to be made to any person, association, corporation, entity, or community in order to induce anyone or the public in general to vote for or against any candidate or withhold his vote in the election, or to vote for or against any aspirant for the nomination or choice of a candidate in a convention or similar selection process of a political party.”

Ang tumong ning maong balaod mao nga sa eleksyon molutaw ang tinuod nga kabubut-on sa katawhan, sa mga botante nga wa mahaylo sa salapi, trabaho, sa mga pabor nga gihatag ug gisaad, sa mga lingaw-lingaw, pagkaon ug inom ug uban pa.

Dunay panultion nga nag-ingon nga “Vox populi, vox Dei,” ang tingog sa katawhan mao ang tingog sa Diyos. The voice of the people is the voice of God. Mao kini ang dugokan sa usa ka eleksyon nga matod pa mao ang panahon diin ang katawhan mopabati sa ilang tingog pinaagi sa balota.

Apan unsaon man paglutaw sa tinuod nga tingog sa katawhan kon ang mga botante gipalit aron mobotar sa usa ka politiko o kaha, paliton ang botante nga pabor sa pikas aron di na lang gyud mobotar?

Dunay nisugyot ngadto sa mga botante nga koprason o kan-on ang paon, apan iluwa ang taga. Dawaton ang kuwarta, apan botar segun sa anaa sa imong konsiyensiya aron molutaw ang tinuod nga tingog sa katawhan. Way obligasyon ang botante ngadto sa namalit og boto. Total di man nila makita kon si kinsay imong gibotaran. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph