CALBAYOG City, Samar - Dead on the spot ang usa ka barangay kagawad ning siyudad human gipusil sa riding in tandem, alas 8:45 sa buntag, Miyerkules, Mayo 8, 2019.
Giila ang biktima nga si Benjamin Mayran, 57, taga P2, Barangay Cagbilwang.
Base sa inisyal nga imbestigasyon, padung sa Calbayog proper ang biktima, kinsa nagmaneho sa iyang motorsiklo.
Pag-abot sa Barangay Poblacion, Oquendo District, niabot ang duha ka mga responsable sakay sa motorsiklo.
Gipusil si Mayran gamit ang wa pa matino nga kalibre sa armas.
Sa wa pa ang hitabo, alas 12:35 sa kadlawon sa samang adlaw, nakadawat og report ang kapulisan sa Calabayog bahin sa pagpangrakrak sa tulo ka mga balay sa Barangay Bogtong.
Niresponde ang kapulisan pinangulohan ni Police Lieutenant Colonel Joie Yape.
Nasayran sa kapulisan nga ang insidente nahitabo alas 11:30 sa gabii, Martes, Mayo 7, 2019.
Girakrakan ang balay nga iya ni Barangay Kapitan Olimpio Prasmo, Susan Salomon ug Raul Cantiga.
Ang lugar dunay gilay-on nga 40 kilometros gikan sa Calbayog Police Station ug way signal sa cellphone.
Dugang sa imbestigasyon nga naka pwesto sa elevated portion ang mga responsable.
Blangko pa usab ang kapulisan kon kinsa ang responsable sa pagpangrakrak ug unsa ang motibo. (JKDP)