NAGLISOD pa ang Lapu-Lapu City Police Office LCPO sa ilang imbestigasyon sa pagpusil patay kang Police Master Sergeant Joseph Villamor atubangan sa iyang balay sa Brgy. Babag, Dakbayan sa Lapu-Lapu niadtong Mayo 3 sa gabii.
Sa nagpadayong pakisusi sa kapulisan sa hitabo, menos o limitado ang mokooperar kanila.
Mao kini ang gitug-an ni Police Colonel Limuel Obon, director sa Lapu-Lapu City Police Office LCPO.
Matod ni Obon bisan ang mismo mga gwardiya sa subdivision nga gipuy-an ni Villamor dli usab makasulti diin posibleng niagi ang mga gunman.
Adunay gwardiya nga nibutyag nga naay laing access road o agianan sa subdivision nga mahimong maagian gawas sa main gate hinungdan nga posible usab nga didto niagi ang mga gunman.
Sa pakisusi sa kapulisan, wa usay CCTV nga gi montar sa main gate kun entrance sa subdivision nga magamit unta sa pag-ila sa posibleng gunman nga nisud ug nigawas human sa pagpamusil. Limitado usab ang impormasyon nga nakuha sa kapulisan sa mga kasilinganan ni Villamor.
Sa mga taho nga giingong nalambigit sa ginadiling drugas si Villamor kaniadto ug anaa sa listahan, di makakompirmar si Obon kalabot niini sanglit wa siyay listahan sa mga pulis nga giingong nalambigit sa drugas gikan sa kaulohan.
Puro ra usab hugon-hugon ang impormasyon kalabot sa pagka drayber kaniadto ni Villamor ni kanhi Police Regional Office PRO-7 Director Marcelo Garbo, kinsa gihinganlan ni Presidente Rodrigo Duterte nga lakip sa mga “narco cops”.
“Useless pala yung guard pag naay makalusot sa laing area,” pagpasabot ni Obon.
Usa ka gunman nga nag-angkas sa usa ka motorsiklo ang nipusil patay kang Villamor.
Si Villamor naigo sa ulo ug ubang bahin sa lawas.
Giingong nitubag og tawag sa telepuno si Villamor dihang ning-abot ang duha ka mga killer sakay sa motorsikllo.
Niadtong Mayo 2014, si Villamor nga police officer 3 pa kaniadto naigo sa tiyan sa giingong pinusilay tali sa kapulisan ug duha ka gidudahang drug dealers.
Sila si Villamor nagpahigayon og buy bust operation sa Barangay Looc sa mao nga dakbayan dihang girakrakan sila sa mga tawo nga sakay sa usa ka awto. Sa ilang pagbawos, napatay ang duha ka mga suspek samtang si Villamor naigo sa tiyan. (GCM)