GIIPASALIG ni Lieutenant Colonel Sally Cabig, assistant director for operations sa Philippine Airforce PAF, nga moabot sa 10 sa ilang mga personnel ang gikatakdang ipang deploy sa lima ka mga police station sa Lapu-Lapu City Police (LCPO).
Kini aron maoy magsilbing quick response team sa matag police station nunot sa pagkuwang na unya sa mga personnel sa kapulisan gumikan sa deployment sa umaabot piniliay.
Nasayran nga kasagaran sa mga personnel sa matag police station ipakatap na sa ilang nagkadaiyang assignment sugod karong adlawa, Mayo 9, hinungdan nga gamay na lang ang mahabilin sa mga police station.
Nunot sa maong augmentation sa PAF, hayan dili mabalda ang operasyon sa kapulisan sa ilang pagresponde unya sa mga insidente.
Gawas sa 10 ka mga personnel matag police station, moabot sa 170 ka mga personnel tanan ang ipakatap sa PAF sa tibuok Lapu-Lapu aron moabag sa kapulisan.
“Until May 16 sila pagkatapos na nang election talaga sila uuwi,“ matod ni Cabig.
Kagahapong adlawa Mayo 8 gipahigayon ang pre-deployment briefing sa Lapu-Lapu City Police Office LCPO diin gipahimangnoan ang kapulisan sa ilang papel sa umaabot piniliay.
Karong adlawa mao ang pormal nga deployment sa kapulisan diin gikatakda silang mohatag ug seguridad sa mga Commission on Elections Comelec personnel sa ilang pagbiyahe sa election paraphernalia. (GCM)