OPISYAL nga kandidato pagka-mayor sa dakbayan sa Lapu-Lapu si Junard Chan human nga ang Commission on Election (Comelec) En Banc niluwat na sa ilang opisyal nga tubag kabahin sa disqualify case batok kaniya.
Samtang mi-congratulate si mayoralty candidate Rolando Patalinjug sa Team Lando (United Nacionalist Alliance) ngadto ni Chan human sa maong kalambuan.
Personal nga gitunol ni Lapu-Lapu City election assistant Benjie Dayondon ang kopya sa Resolution No. 19-0388 “In The Matter of The Certificates of Candidacy of David Miclat Dungo and Junard Q. Chan” ngadto sa buhatan ni Chan sa barangay Pajo kagahapon sa buntag, Mayo 8.
Nasayran nga si Dungo nga nagpapili pagka-Sangguniang Bayan, San Simon, Pampanga ang dunay susamang kaso ni Chan.
Ang resolution nagkanayon: “As it hereby RESOLVES to confirm the inclusion by the Law Department in the list of official candidates, Mr. Junard Q. Chan, candidate for thw position of Mayor, Lapu-Lapu City, Cebu.”
Ang dokumento pinirmahan Comelec En Banc chairman, Sheriff Abas ug commissioners Al Parreño, Ma. Rowena Amelia Guanzon, Marlon Casquejo ug Luie Tito Guia.
Nahupay si Chan sa tubag sa dugay na niyang pangutana kalabot sa gipakatap sa iyang kaatbang nga Team Lando nga disqualified ang iyang kandidatura gumikan sa sayop nga porma nga iyang gi-fill up atol sa pagduso sa iyang certificate of candidacy (COC) niadtong Oktubre 16, 2018.
Nasuta nga duha ka matang sa porma ang giduso ni Chan sa City Comelec Office atol sa filing sa COC ang daan ug ang amended form nga pulos notaryado.
“These circumstances give credence to the certification of Atty. Ann Janette Chua-Hu Lamban that the COC using the amended form was filed on 16 October 2018 together with the other copies,” natala sa En Banc resolution.
“Karong adlawa, puwede nakong ideklara ang kadaugan sa katawhang Oponganon. Mao ni ang akong ipa-abot kanila nga ang ilang gi-allege dire nako, dili gyud diay tinuod,” tipik sa pamahayag ni Chan.
Dugang pa sa maong kandidato nga naklaro na nga opisyal siyang kandidato pagka-mayor sa Lapu-Lapu sukwahi sa gipasiatab sa iyang kaatbang.
Si Patalinjug, sa iyang bahin, namahayag nga iyang gitahod ug gidawat ang desisyon sa Comelec En Banc ug dili kini nila supakon.
“Good for Ahong (Chan). Congratulations to him,” paapas ni Patalinjug.
Si Lapu-Lapu City Mayor Paz Radaza mikomento, “Wa mi mo-mind ana nga isyu (disqualification case ni Chan).
Di hinakot
Samtang, giklaro ni Chan nga mga nitambong sa grand rally niadtong Dominggo, Mayo 5 nga gipahigayon sa Camella Homes subdivision, Barangay Pajac dili mga hinakot.
Matod ni Chan nga ang hawanan sa maong subdivision adunay duha ka mga ektarya nga gilapdon.
Ang mao nga dapit napuno sa mga tawo nga ilang dumadapig ug nanambong sa ilang rally.
Star-studded sab ang kalihokan nga nakapahugyaw sa audience sa dihang milugwa ang sexy comedienne Gisele Sanchez ug uban pa. (FVQ)