GIINDORSO ni Police Colonel Royina Garma ang iyang usa sa labing maanyag nga policewoman sa Cebu City Police Office nga sunod nga security aide de camp ni Presidente Rodrigo Duterte.
Si Police Lieutenant Ma. Fatima Lorraine Tejada, sakop sa PNPA Masundayaw Class of 2016, maoy gituboy ni Police Colonel Royina Garma aron himuong aide de camp ni Duterte.
Matod ni Garma nga nagpatabang kaniya si Duterte pagpangitag aide de camp hinungdan nga girekomendar niya si Tejada.
Niadtong Lunes, Mayo 6, nagkita na sila ni Duterte ug gipaabot na lang ang tawag niini kon kanus-a siya palargahon paingun sa Malacañang.
Si Tejada nagpangidaron pag 26, lumad nga taga lungsod sa Magsaysay, Probinsya sa Lanao del Norte.
Bugtong siyang anak ni Lelanie Oyog Perales.
Ang iyang mga uyoan nga naa usab sa Philippine National Police (PNP) organization ang naghatag niyag insperasyon nganong nisulod siya sa serbisyo.
Gisuportahan usab sa iyang inahan ang iyang tinguha nga mosulod sa Philippine National Police Academy.
Gihulagway niya nga lisud ang training sa PNPA, apan pagdasig sa iyang mga kauban ug mga higala milampos siya sa upat ka tuig sa academy.
“Lisod. But with the right amount of attitude and mga peptalk ng mga kabayan, company mates ug seniors, high morale pa rin,” matod ni Tejada.
Garbo alang niya kon siya ang mapilian ni Presidente Duterte nga mahimong aide de camp tungod kay presidente ang iyang silbihan.
Niadtong miaging tuig, gidestino siya sa probinsya sa Siquijor isip station commander sa usa sa mga lungsod sa maong isla.
Nakita ni Garma ang ka snappy ni Tejada hinungdan nga iya kining gituboy ngadto kang Presidente Duterte nga sunod nga aide de camp.
Gawas sa pagka snappy ni Tejada, utokan usab kini nga haom sa posisyon nga mobantay sa labing gamhanang tawo sa Pilipinas.
Sa mga presidente sa Pilipinas, si Duterte gikatahong ang nipili nga babaye ang mamahimo niyang aide de camp. (AYB)