PULOS hubo sa ilang mga sapot samtang nagginaksanay nga nanghigda sa kama ug malipayon nga naghinagkanay dihang naabtan sa 39 anyos nga bana nga overseas Filipino worker sa United Arab Emirates ang iyang asawa ug giingong kabit niini sulod sa ilang kwarto niadtong Lunes sa alas 10:30 sa gabii, Mayo 6.
Si Reynante, di tinuod nga ngalan, 39, lumolupyo sa usa sa mga barangay sa lungsod sa Liloan, nagpatabang sa kapulisan human niya masayri nga adunay laing gikarelasyon ang iyang asawa samtang didto siya sa abroad.
Si Reynante mismo ang nakasakop sa usa ka lalake nga nisulod sa ilang balay ug nakighawok sa iyang asawa niadtong Lunes.
Giubanan dayon siya sa mga pulis sa lungsod sa Liloan human nila makuha ang pamahayag niini labot sa bisyo sa iyang asawa nga nagpangidaron pag 38 anyos.
Sa ilang pag-abot, unang nisulod si Reynante sa ilang master’s bedroom nga niadtong tungora wa gi lock ang pultahan.
Didto iyang naaktuhan ang hubo nga lawas sa iyang asawa ug kabit nga nagginaksanay pa nga nagromansa, hubo ug padung na mag-sex.
Daling gisikop sa mga pulis ang duha nga gitago lang sa ngalan nga Edna, 38, lumad nga taga lungsod sa Ginatilan, ug Abel, 34, minyo usab, taga Tintay, Barangay Talamban, Siyudad sa Sugbo.
Nagpatuo
Matod ni Police Major Danilo Colipano, hepe sa Liloan Police Station, taod-taod na nga naabot sa Liloan si Reynante gikan sa abroad.
Didto pa lang sa gawas sa nasud, aduna nay nihatag kaniya'g impormasyon nga ang iyang asawa nagluib na kaniya tungod kay aduna nay lain nga gikarelasyon.
Ang magtiayon dunay duha ka mga anak.
Sa iyang pagpauli, padayon nga nangabot ang mga impormasyon nga iyang nadawat.
Bisan tuod kon nagduha-duha siya sa pagtuo, iyang giplano kon unsaon pagmatuod ang mga impormasyon nga iyang nadawat.
Wa usab niya gikomprontase ang iyang asawa kabahin niini aron di makabantay nga nakahibawo na siya sa sekreto niini.
Niadtong Mayo 1, si Reynante nananghid kang Edna nga mobalik na siya sa UAE.
Wa masayod ang iyang asawa nga iya na kining giplano nga iyang patuohon nga molarga na siyag balik sa abroad.
Tuod man, gihatod pa siya sa airport sa iyang asawa.
Apan sa dihang nakalakaw na kini sa airport, nibalik usab si Reynante sa Liloan ug didto siya nisaka sa balay sa iyang igsuon.
“Iyang gi bluff iyang asawa nga mobalik na siya sa gawas. Mao to, gihatod pa siya sa iyang asawa sa airport. Pero wala siya modayon. Sugod ato, gi-surveillance na niya iyang asawa,” matod ni Colipano sa Superbalita Cebu.
Nasakpan gyud
Human sa lima ka adlaw nga pagpaniid, iyang nakita ang usa ka lalake nga misulod sa ilang balay niadtong Lunes sa gabii nga malipayon usab nga gihangop sa iyang asawa.
Nisamot pa ang iyang pagtuo nga aduna kiniy relasyon tungod sa iyang nakita nga naggakos ang duha sa sala pa lang sa balay ug naghawok.
Giingong sudlon na unta kini ni Reynante aron iyang ibutang sa iyang mga kamot ang balaod ug pamatyon ang duha.
Apan giingong naka huna-huna pa siya nga di maayo ang iyang plano.
Inay kumkumon ang balaud, nidali pag adto sa police station si Reynante ug gitug-an ang tanan nga gibuhat sa iyang asawa ngadto sa kapulisan.
Giubanan dayon sa mga pulis si Reynante.
Aron maaktohan nila ang duha, nihinay sila sa pag-abli sa pultahan sa balay.
Sa pag-abli ni Reynante sa pultahan, ilang naaktuhan ang hubo nga mga lawas sa duha nga naghigda sa kama sa magtiayon nga padung na unta magtagay sa lawasnon nga kalipay.
“Pag adto sa atong mga pulis, naaktohan gyud nga naa gyud silang duha sa kwarto naggakos ang duha. Naa gani video nga nakuha ang bana. Pero atong gi respeto ang privacy sa bana,” dugang ni Colipano.
Kasong adultery ang gipasaka sa bana batok sa iyang asawa ug kabit ngadto sa korte.
Hangtod ning pagsuwat, naa pa kini sa selda sa Liloan Police Station.