SI CEBU City Vice Mayor Edgardo Labella, kandidato sa pagkamayor sa Partido Barug-PDP Laban, niadto sa Malacañang Palace niadtong Lunes, Mayo 6, aron makigtagbo ni Presidente Rodrigo Duterte isip representante sa iyang partido.
Sa hulagway nga iyang gi-post sa Facebook, si Presidente Duterte sa makausa pa miisa sa kamot ni Labella isip timaan sa iyang pagpaluyo kang Labella ug sa iyang ticket sa lokal nga eleksyon sa syudad sa Sugbo sa umaabot nga Mayo 13.
Unsa man kaha ang epekto sa pag-endosar ni Presidente Duterte kang Labella? Sama kaha kini sa kang Bong Go, ang sinaligan sa pangulo? Wa manimaho si Go sa unang mga survey sa pagkasenador. Apan human sa pagkampanya ni Presidente Duterte, si Go anaa na sa top five.
•••
Unsa man sab kaha ang gihisgutan tali ni Labella ug sa presidente? Sa usa ka press conference, si Labella niingon nga siya ug ang presidente naghisgut bahin sa pagtukod sa usa ka Light Railway Transit (LRT) ug usa ka massive low cost housing.
Miingon si Labella nga nipasalig kaniya ang pangulo nga magpadayon siya sa pagpaluyo sa syudad sa Sugbo ug sa mga proyekto sa syudad. Wa mosulti si Labella nga buhaton lang kini sa pangulo kon siya maoy mapili nga mayor.
“Matod pa niya (Presidente Duterte), Cebu is close to his heart,” nagkanayon si Labella. Wa siya moingon kon si kinsa ang di suod sa kasingkasing sa presidente. Pero kanang LRT, madayon lang tingali na kon si Labella maoy mapili nga mayor.
•••
Si Labella niingon nga ang iyang pakigtagbo sa pangulo mao ang rason nga iyang gipa-oktaba sa Integrated Bar of the Philippines (IBP) Cebu City Chapter ang debate sa mga kandidato sa pagkamayor gikan sa Mayo 6 ngadto sa Mayo 10, karong adlawa.
Pero wa pay seguro kon madayon ba ang debate tali ni Labella ug ni Cebu City Mayor Tomas Osmena karong adlawa. Ang mga botante sa syudad nakahibawo na kon si kinsa ang ilang botaran sa umaabot nga eleksyon.
Si Vice Mayor Labella mahimong adunay Duterte factor sa umaabot nga eleksyon sama sa nasinati ni Bong Go. Apan di kaha kini mahilis sa pinalitay sa boto. Sa makadaghan nga higayon, ang ballpen sa mga botante gipadpad sa kusog nga hangin dala sa kuwarta.