DAKO kaayong puntos alang kang Cebu City Vice Mayor Edgardo Labella, kandidato pagkamayor sa Barug PDP Laban, ang endorsement ni Presidente Duterte. Si Labella personal nga gi-endorso ni Digong base sa video nga mikatap sa social media ug sa mga propaganda sa mainstream media sa Malacañang niadtong Lunes. Dili lang yano nga endorsement pinaagi sa pag-isa sa kamot ni Labella kon dili naghangyo pa si Digong nga botaran si Labella.
Nagkanayon ang Presidente nga “si Labella usa ka tarong, ligdong ug dili kurakot. Nasayod kon unsa ang tinud-anay nga public service.” Nanawagan pa si Digong nga angay na nga ilisan ang namunuan karon dinhi sa dakbayan sa Sugbo kay diktador. Magbuot-buot. Abi nilag ila ang gobiyerno. Singgit-singgitan lang ang mga tawo. Giisip ug gitratar ang mga Sugboanon nga morag iyang mga saop ug ulipon. Panahon na, matod pa, sa Presidente nga ilisan na ang maong tawo nga midumala sa dakbayan sulod na sa pipila ka dekada dala ang hangyo sa mga Sugboanon nga suportahan si Labella.
Popular pa si Digong ug dako ang posibilidad nga daghang mga Sugboanon ang mosanong nga suportahan si Labella. Pero mao lagi na nga dili garantiya nga ang endorsement sa Presidente makapadaog. Kay daghang factors nga angay i-konsiderar. Labi pa og mosagop sa vote buying ang usa ka kandidato sama sa gihimo niini sa miaging mga eleksiyon.
Pulihan na
Migasto ang Office of the Presidential Assistant for the Visayas alang sa propaganda batok sa “kanhi laos nga pulitiko.” Kining “pulihan na Sugbo” gitumong kini batok sa “kanhi laos nga pulitiko” nga angay na nga hulipan sa pagkamayor. Mabati ang propaganda sa mga radio ug TV stations. Mao kini ang gitawag nga negative campaigning. Isyo sa basura, baha, peace and order ug tubig nga wa mahatagi og kasulbaran sa kasamtangang administrasyon ang propaganda. Adunay campaign materials ug t-shirts ang mikatap nga “pulihan na.”Klaro nga si Presidential Assistant for the Visayas Mike Dino mao ang nagpasiugda niini. Kay siya man usab ang unang nagpagawas niini sa media. Si Dino usab siguro ang naggasto aning mga propaganda. Dumot ning ila sa “kanhi laos nga pulitiko” kay mihimo og lakang si Dino nga mapilde kini. (bobbygnalzaro@gmail.com)