NAIGKING ang nasod sa paggawas sa misteryusong si “Bikoy” sa YouTube nga nagpasangil kang Presidente Rodrigo Duterte ug pipila ka mga sakop sa iyang pamilya nga nalambigit sa illegal drugs.
Tungod sa mga alegasyon nga grabe, nilihok gilayon ang makinarya sa kagamhanan aron pag-ila ug pagdakop kang Bikoy.
Sa iyang mga detalye sa video, hayan dunay nagduda o nakombinser na nga nalambigit sa illegal drugs si Duterte.
Samtang naglibog ug nagkapa-kapa sa pagpangita kang Bikoy ang mga awtoridad, kalit lang siyang nipatim-aw kuyog sa mga madre ug nagpatabang sa Integrated Bar of the Philippines (IBP). Siya diay mao si Peter Joemel Advincula.
Sa iyang pagtumaw, nahibaw-an nga duna diay siyay kwestyonabling kagahapon. Duna siyay problema sa kredibilidad. Apan ang mas grabe mao ang impormasyon nga gibutyag ni Senador Tito Sotto. Niadto diayng 2016, si Advincula niduol na sa Senado. Unsay iyang gibutyag? Sama ra sa iyang mga alegasyon batok kang Duterte, apan lahi ang iyang characters.
Sa records ni Sotto, ang gipasanginlan ni Advincula mao si kanhi presidente Benigno Aquino III, Senador Leila de Lima ug uban pa. Ang tanang mga alegasyon sa pagkalambigit sa illegal drugs pareho ra, mga ngan ra ang iyang giilisan.
Daghan ang nagtuo, labina sa mga kritiko sa administrasyon, nga dako og kadaut ang bombshell ni Advincula. Apan diay, sipa pa ang utot.
Kang kinsa man nga kredibilidad ang nadaut na hinuon niini? Ang oposisyon, ang Liberal party ug uban pang mga grupo nga kritiko sa administrasyong Duterte. Kay kinsa may laing dudahan nga nagpaluyo niini, di ba mga kontra sa administrasyon?
Kon nagpadayon pa si Bikoy sa iyang pagka misteryuso, wa maguba ang black propaganda batok sa administrasyong Duterte. Sama sa pelikula, nindot unta ang dagan sa estorya, apan kalit nga naguba ang script. Bati ang ending.