KANUNAY lang makakitag sinumbagay si Samokboy sa ilang eskuylahan tungod kay aduna gyuy magbugalbugal kaniya. Singgitan siya, “Samokboooyyy taas og dunggan! Liwat sa rabbitttt! Liwat sa konehooooo! Hahaha! Hoooooo!” Ug kataw-an dayon siya sa mga pareho niyag edad nga mga bata sa eskuylahan. Hapit pod mosuliyaw ang tanan niyang klasmeyt ning maong pagbugalbugal. Ang mahitabo mao nga atngan niya inigpauli nila sa tingpaniudto kadtong unang mibugalbugal kaniya ug mahitabo ang sinumbagay. Usahay tabangan siyag kulata, apan isog si Samokboy nga makigkumbate pod sa ningtabang kaniya. Magkadugo intawon ang iyang ulo ug nawong. Naguol dayon si Estela, iyang inahan, nga magkadipudipo intawon pagtambal sa iyang samad.
“Sa sunod, Dong Mokboy, ayaw na kana silag tagda, uy! Pasagdi na sila. Ayaw paminawa ang ilang pagbugalbugal nimo,” tambag ni Estela sa iyang anak.
“Sige man god silag bugalbugal nako, Ma. Di na ko kaagwanta, makigsinumbagay na ko,” ni Samokboy. “A, kining... Ma, nganong taas man kaayo kining akong dunggan? Sila lagi si Kuya Baldo, Ate Nanet, Lito ug Inday Litlit di man lagi taas ug dakog dunggan parehas sa ako?” Dihay kasubo sa ganay sa tingog ni Samokboy. Bitaw, siya ray lahi sa iyang mga igsuon kay siya ray taas ug dakog dunggan nga sama sa rabbit o koneho.
“Pagbuot na sa Ginuo, Dong,” hinay nga mitubag si Estela. Nahinumdom siya nga sa nagmabdos pa siya kang Samokboy, ang koneho nilang Inse Madang, ilang silingan, maoy iyang gipangalaan kay ganahan man gyud siyang motan-aw ning mananapa matag hapon. Ug mao ni ron, miliwat si Samokboy sa rabbit nga hilabihan kataas ang dunggan. Pero dunggan man lang ang diperensiya ni Samokboy kay kon bahin sa iyang nawong, makita nga ambungan siya nga pagka tawo. Karon nga hingkod na siyang ulitawo midako pod pagsamot ang iyang dunggan, apan molutaw gyud ang iyang kaguwapo. May hilom nga nahigugma kaniya ug kini mao si Adelfa, ang maanyag nga dalaga nga nagkuhag kursong Social Work sa usa ka unibersidad sa siyudad. Apan ang gugma wala sa hunahuna ni Samokboy kay ang iyang giatiman mao man ang pagsigeg tagik og balak. May talento siya nga wala sa iyang mga igsuon. Napatikan na siyag pipila ka mga balak sa inilang tabloid sa dakbayan. Sa iyang balak duna gyud siyay gipahinungdan ug kini mao si Adelfa, anak sa magtiayong Guding ug Pilar nga tigpatanto og kuwarta.
USA ka hapon nahiabtan ni Adelfa si Samokboy nga nagbalak-balak diha ilawommsa punoan sa dakong akasya nga duol sa ilang balay.
“Oh, akong Bathaluman, nga sa akong damgo lang nako maangkon!/ Adelfa, kaanindot ug katahom sa imong ngalan/ nga maoy gidayandayan ko ning nagmingaw kong dughan./ Unta imong masayran kining hilom kong daman/ nga hangtod sa kahangturan/ mahimo na nakong lamdaman!/ Oh, akong bulak nga Adelfa...!”
“Hoy, Samokboy! Mahal diay ko nimo? Mahal sab baya tika!” ni Adelfa nga diha na sa kilid ni Samokboy.
Wala makatingog ang ulitawong magbabalak. Naamang siyag kadiyot, apan ang balak sa iyang gugma napagawas na niya ug nadunggan kini ni Adelfa nga migunit sa bukton ni Samokboy kansang mga mata hugot nga mitutok sa mga mata sa dalaga nga hilom nga nahigugma kaniya. (KATAPUSAN)