DILI ikalalis nga dako og gasto kon ikaw mobiyahe paingon sa laing mga nasud sa tuyo nga mosuroy ug makita personal ang ilang nindot nga talan-awon sama sa mga landmark o iconic place nga nahimong inila ang usa ka lugar.
Apan gusto ka bang molaag sa dapit diin makita ang mga sikat nga landmark sa New York, USA nga Statue of Liberty, Merlion sa Singapore ug uban pa, nga wa magkinahanglan og passport ug visa?
Ania na nga tubag sa inyong damgo o sa pagkompleto sa inyong bucketlist nga makataak sa naasoyng mga lugar.
Ang Sikatuna Mirror of the World and Botanical Garden (SMWBG) nga nahimutang sa Barangay Libjo, lungsod sa Sikatuna, lalawigan sa Bohol naghatag og kasayon ug kahigayonan sa mga turista nga nahisama og “ALL IN ONE” diin naa na sa usa ka dapit ang landmark sa lain-laing nasud.
Niadtong Disyembre 2018, gipahigayon ang soft opening sa SMWBG nga nahimutang sa Barangay Libjo sa lungsod sa Sikatuna.
Talan-awon sa SMWBG
Sulod sa upat ka ektaryang SMWBG nga makita sa mga lokal ug langyaw nga turista bisan kon ang nagpadayon pa ang construction Phase 1.
Nagbuntaog nga colossal neoclassical sculpture nga Statue of Liberty nga gikopya sa Statue of Liberty National Monument nga anaa sa Liberty Island, New York Harbor, New York, USA.
Kon natagbaw namo sa pagpahulagway sa estatuwa pipila lang ka tikang moabot na nimo nang Singapore diin makita ang official mascot sa maong nasud ang mythical creature nga Merlion statue nga adunay ulo sa lion ug lawas sa isda.
Sa uban nga layo ang kahigayonan nga makabiyahe paingon sa Rio de Janeiro, Brazil pahimusli ang higayon kay ang cultural icon sa maong nasud nga nalakip sa New Seven Wonders of the World ang Christ the Redeemer anaa sab sa SMWBG.
Makita sab ang nagkadaiyang estatuwa nga Greek gods ug goddesses, busa sulit ang inyong gibayad sa ubos ra nga kantidad.
Si Maria Elsie Artobal, sinaligan sa magtigayon nga Kolsto nga maoy tag-iya sa maong property miingon nga kaniadto usa lang kini ka resthouse ug nga adunay mga hayop ug utanon para ilang magamit sa retirement.
Apan dihang nakabakasyon sila sa lain-laing mga nasod, gusto ni Ann nga butangan usab og mga estatuwa ang ilang farm ug naumol gumikan usab sa tabang ni Architect Rey Villegas.
Si Artobal niingon nga kutob sa phase 5 ang construction sa SMWBG ug karon padayon pa nga gi-trabaho ang bantugan nga bridge nga adto lang makita sa London.
Sa umaabot nga panahon, makita usab ang Golden Gate Bridge nga adto ra masud-ong sa San Francisco, California sa US, ang bantugan nga Niagara Falls nga nahimutang sa utlanan sa US ug Canada, Virgin of Mt. Carmel ug daghan pang uban.
Tuyo sa magtiayong Kolsto nga masinati sa mga Pinoy ang mga talan-awon nga adto ra makita sa laing mga nasod diin ang ubang mga tawo dili maka-afford sa paggasto.
Entrance fee
Inig abot sa maong lugar, andama lang ang P120 para sa dagko, P100 para sa senior citizen ug P50 para sa mga bata.
Bukas ang SMWBG gikan sa 7:00 am-5:00pm matag adlaw ug adunay P30 nga usbaw kon mosulod ka gikan sa alas 6:00 sa gabii ngadto na sa 9:00 sa gabii ug pabiling P50 ray bayranan sa mga bata.
Unsaon pag-adto?
Kon ikaw gikan sa Sugbo o gikan sa laing Probinsya mahimong mosakay og fastcraft paingon sa Tagbilaran ug mahimo sab mag-eroplano nga motugpa sa Panglap International Airport.
Laing alternatibo sa pagpa-ingon sa maong dapit pinaagi sa pagsakay og habalhabal, bus o Grab padulong sa Sikatuna nga adunay 17 kilometros ang gilay-on gikan sa Tagbilaran sanglit molagbas pa sa lungsod sa Corilla sa dili pa maabot sa Sikatuna. (Hulagway hinatag ni Amie Atuel ug SMWBG)