HUMAN sa tulo ka buwan nga training didto sa Amerika, gikatakdang moaway na karong Hunyo 1, 2019 si interim World Boxing Association (WBA) world featherweight champion Jhack Tepora.
Ikasangka ni Tepora ang Mexicanong si Jose “El Torito” Gonzalez sa usa ka non-title 10-round fight sa wala pa matino nga dapit.
Ang 28 anyos nga Gonzalez (23-7-1, 13KOs) nakaaway na alang sa International Boxing Federation (IBF) world title niadtong 2016 batok ni Zolane Tete, apan napildi kini pinaagi sa technical knockout decision sa ikapito nga round.
Hinuon dili impresibo si Gonzalez sa uwahi niyang upat ka mga away diin nakaangkon man kini og tulo ka sunodsunod nga kapildihan pinaagi sa decision.
Niadtong Marso 21, natabla ang iyang away batok ni Manuel Avila (23-1) nga gipahigayon didto sa Hollywood, California.
Samtang ang 24 anyos nga Tepora aka El Capitan kinsa wala pay pildi sa 22 ka away nga may 17 ka knockouts milangkat sa interim WBA world featherweight title pinaagi sa pag-knockout ni Edivaldo Ortega sa supporting bout sa away ni Manny Pacquiao ug Lucas Martin Matthysse didto sa Axiata Arena, Kuala Lumpur sa niaging tuig.
Gikatakda unta siyang modepensa sa titulo niadtong Enero batok ni Hugo Ruiz sa Mexico apan nakanselar kini human wala makakuha sa iyang timbang ang 23 anyos nga Cebuano fighter.
Ang uwahing pagpahibawo sa iyang away maoy usa sa mga rason kon nganong wa siya kapangandam og maayo hinungdan sa iyang pagka overweight.
“Ok ra kaayo akong training diri, Sir. Sa pagkakaron 142 lbs. na ko, unya 128 lbs. among awayan,” matod ni Tepora kinsa ubos karon sa paggiya sa laing Sugboanon nga kanhi world champion nga si Rodel “Batang Mandaue” Mayol.
Sa sayo pa, si Mayol mihulagway kang Tepora nga adunay igong katakos og abilidad, apan sa samang higayoon iyang gipadayag nga nagkinahanglan pa kini og maturity.
Buot ipasabot nga kuwang og pagtutok sa iyang boxing career si Tepora - butang nga mao karon ang gustong ipasunod ni Mayol sa iyang bag-ong batos.
Dinuyogan sa pag-abag sa lumad nga taga Mandaue, sayod si Tepora kon unsay kaugmaon nga mapaabot sa iyang boxing career, ug kini magsugod karong Hunyo 1 sa iyang unang away didto sa Amerika nga maoy mag-abli sa pultahan alang sa kahigayonan nga makakulit og dakong pangalan sa natad sa pamoksing.
Goodluck, Jhack. Goodluck El Capitan. Alang sa inyong sugyot ug komento mahimong mahimong mo-email sa jun.migallen22@gmail.com