UPAT ka gidudahang armadong lalaki ang nasikop sa kapulisan ug sakop sa militar human gihasi nila ang balay sa usa ka nagpapiling konsehal sa Barangay Bugho, lungsod sa San Fernando niadtong Huwebes sa hapon, Mayo 9.
Nasikop sa mga sakop sa 47th Infantry Batallion (IB) sa Philippine Army sila Romeo Olis Jr., 39 anyos; Frisco Tapales, 29 anyos; Manuel Alidon, 34 anyos ug Anastacio Solis, 50 anyos.
Ang upat ka lalaki nga na-aresto giingong gidudahang mga "armed goons" ni Ruben Feliciano, usa ka negosyante nga nagpapili pagka-mayor sa maong lungsod.
Pero sa pakighinabi sa Superbalita Cebu, gihimakak ni Feliciano ang mga pasangil ug gisumbalik niya ug pasangil sa grupo ni San Fernando Mayor Lakambini "Neneth" Reluya nga maoy nagpadala sa mga goons para mupatay niya sa dihang nangampanya siya sa Barangay Bugho.
Sigon ni Patrolman Philip Gesto sa San Fernando Police Station, ang upat ka armadong lalaki nadakpan human kini nisukol sa mga sakop sa 47th IB pasado ala 1 sa hapon sa Huwebes.
Nakuhaan ang upat ka suspetsado ug duha ka .357 magnum revolver, usa ka clip nga naay sulod nga bala sa M1 Garand Rifle, 12 ka buhing bala sa Smith and Wesson .357 revolver ug duha ka motorsiklo.
Matod pa ni Gesto, niadto ang mga sakop sa 47th IB human kini nakadawat ug distress call gikan sa kapitan sa Barangay Bugho nga si Lorenda Basalo kabahin sa presensya sa mga armadong tawo sa maong dapit.
Sa dihang niabot ang mga sakop sa 47th IB, giingon gipaarakan sila sa mga armadong tawo, nga maoy niresulta sa engkwentro sa duha ka grupo.
Pero base sa mga storya sa mga namuyo didto sa barangay, pangankon nila nga si Feliciano ug iyang grupo maoy nipasiugda sa maong kagubot.
Giingong nibisita si Feliciano ug iyang grupo sa Barangay Bugho para mangampanya para sa umaabot nga eleksyon.
Sigon sa usa ka kasaligan nga tinubdan nga nihangyo nga di magpahingan, si Feliciano ug iyang grupo niadto sa barangay hall para mangita ni Joy Resogento, usa ka kagawad sa Bugho ug nagpapili pagka-konsehal sa lungsod ubos sa grupo ni Reluya.
Matud pa sa kasaligan nga tinubdan, magmeeting unta ang mga barangay tanod ug barangay health workers niadtong tungora sa dihang niabot si Feliciano para makigkita ni Resogento.
Sa dihang wala si Resogento sa barangay hall, daling nakabiya si Feliciano kuyog sa iyang grupo.
Matud pa sa kasaligan nga tinubdan, nagsakay daw si Feliciano ug iyang grupo ug mga tinted nga sakyanan ug gikuyogan ug balig 20 ka tawo nga nagsakay ug lain-laing motorsiklo.
Mga kapin alas 12 sa udto, niabot dayun ang grupo ni Feliciano atubangan sa balay ni Resogento.
Sa pakighinabi sa Superbalita Cebu, sigon ni Resogento nga nagpahuway ra unta siya sa iyang balay kuyog sa iyang pamilya sa dihang niadto ang mga BHW ug tanod para musulti nga nangita si Feliciano niya.
Sa dihang nanguli na ang mga tanod ug BHW, niabot ang grupo ni Feliciano atubangan sa balay ni Resogento.
Matod pa ni Resogento, nakit-an niya nga ninaug si Feliciano sa iyang sakyanan ug nagsul-ob kini ug t-shirt nga green ang kolor.
Kuyog ni Feliciano ang sobra sa 20 ka armed goons nga nagsakay ug mga motorsiklo.
Gibati ug kahadlok si Resogento pagkakita ni Feliciano tungod kay dugay na siyang gibaharan niini sa kada pulong-pulong niya sa barangay.
"Katulo na ka higayon nga nagpulong-pulong sila sa among barangay, ug mubahad gyud na siya nga ipapatay ko niya tungod alyansa man mi ni Mayor Neneth (Reluya)," sigon ni Resogento.
Tungod sa kahadlok, daling nakatawag si Resogento sa detachment sa Philippine Army nga nakadestino sa Barangay Magsico.
Daling nakaresponde ang maong detachment ug nagpadala ug mga tawo niini para mususi sa alesgayon ni Resogento.
Sa dihang niabot ang mga sakop sa army detachment sa atubangan sa balay ni Resogento, usa sa mga gidudahang goons ni Feliciano ang kalit nga nipa-arak sa iyang armas tumong ngadto sa mga sundawo.
Tungod niini, nahitabo ang enkwentro tali sa mga sundawo ug sa mga armadong tawo sa maong lugar.
Sa dihang nag-ginukdanay na ang mga sundawo ug ang armadong mga tawo, giingon daling nakasibat si Feliciano sakay sa iyang awto palayo sa dapit.
Samtang, si Resogento ug iyang pamilya nipalayo una sa ilang barangay tungod sa kahadlok nga baslan sila balik ni Feliciano.
Sa pakighinabi sa Superbalita Cebu, gihimakak ni Feliciano ang mga pasangil ni Resogento ug mga residente sa maong dapit.
Iyang pasangil nga ang mga armadong tawo nga gisikop sa police kay namusil sa iyang caravan sa dihang nibisita sila sa barangay pag Huwebes sa udto.
"Kadakong bakak man na! Nganung mangharass man ko niya nga ako man ang ilang giambush nila didto," sigon ni Feliciano sa Superbalita Cebu.
Pasangil ni Feliciano nga natural nga magmugna ug storya si Resogento kay dako man kaayo siyag kalagot kaniya.
"Natural nang masuko siya (Resogento) kanako kay ginganlan man nako na siya ug drug protector. Nga tinuod man na kay tawo man siya ni Franz Sabalones," sigon ni Feliciano.
Pasangil sad ni Feliciano nga ang mga armadong tawo nga nipasiugda sa kagubot didto sa Bugho kay mga tawo sa iyang kaatbang sa politika.
Dugang ni Feliciano nga andam siya muatubang sa kapulisan kung tawagon siya para sa usa ka imbestigasyon.
Nihanyo sad siya sa kapulisan nga patas lang unta sa paimbestigar niya. (JKV)