NIBUNDAK ang kusog nga pag-ulan kagahapon, Mayo 9, alas 10 sa buntag, sa pipila ka bahin sa dakbayan sa Mandaue, samtang taligsik ug pagpanag-um ang nasinati sa mga siyudad sa Sugbo ug Lapu-lapu.
Ang mga nasinati nga pagpanag-om, mga tutaligsik ug kalit-kalit ug pat-ak pat-ak nga mga pag-ulan, posibleng matagamtaman pa hangtud sa weekend.
Nakapagawas sila og mga thunderstorm advisory sa halos tanan nga mga lugar sa probinsya sa sugbo ug sa silingang mga probinsya sama sa Bohol ug Negros Oriental, Huwebes, Mayo 9, sa tibuok adlaw.
Kini ang gitug-an ni Jhomer Eclarino sa Pagasa Mactan, apan iya usab gipasabot nga tungod lang kini sa localized thunderstorm.
“Ang atong weather ugma, Biyernes (Mayo 10), same gihapon until sa weekend, in general fair weather atong situation, so naa tay init, sunny periods with isolated rainshowers or thunderstorms, mostly dire sa after evening or early in the morning,” pagpasabot ni Eclarino
Anaa usab pay gi-monitor nga low pressure area ang buhatan diha sa gawas sa Philippine area of responsibility, sa silangan dapit sa Mindanao, apan wala kini nakaapekto sa panahon sa nasud, gani gilantawan nga posible siyang mahilis sulod sa 24 ngadto sa 48 ka oras.
Ug nga ang kainit sa panahon ang nagpabilin, gani gilantawan nga temperatura sa Huwebes ug bisan na sa Byernes ng adunay 35 degrees Celsius o mas motaas pa, ug aduna usab kini taas nga heat index kon kainiton nga mabatyagan sa tawo nga moabot sa 45 degrees Celsius.
Ang natala nga 36 degrees Celsius nga adunay heat index nga 46 degrees Celsius, Myerkules ala 1:30 sa hapon, matud ni Eclarino, ikduha nga pinakataas sa 38 ka tuig nga pag-obserbar sa Pagasa Mactan.
Niadtong Mayo 31, 2010 natala ang pinakataas nga niabot og 37 degrees Celsius diin aduna kini heat index nga 50 degrees Celsius.
Gani gipanlantawan nga ning tuiga posible kini nga maapsan pa, tungod usab sa presensya sa weak El Nino phenomenon. (FMD)