PAMULTAHON ang operator nga nagsugod na og pangolekta og P8 nga minimum nga pletihan bisan paman og wala pa gipapilit ang taripa sulod sa pampubliko nga jeepney.
Mao kini ang gibutyag ni Land Transportation Franchising and Regulatory Board (LTFRB) 7 Director Eduardo Montealto Jr., karon nga nagsugod na sila og release sa taripa sa ilahang buhatan.
Niadtong Mayo 8, Miyerkules, dihang nagsugod na og kuha ang mga operators sa public utility jeepneys (PUJs) og taripa diin nagkantidad og P50 ang usa ka kopya niini.
Matod ni Montealto nga kinahanglan nga dalhon sa operator ang photocopy sa ilang prangkisa aron masuta ang rehistrasyon niini ug mahatagan sa taripa.
Dugang sa direktor nga mamahimo nga ang liaison ang moadto sa ilang buhaton aron makakuha sa bag-ong fare matrix.
Kalapasan sa Joint Administrative Order 2014-01 ang pagpangolekta og minimum fare nga wala pa ang bag-ong taripa nga nabutang sud sa jeep.
Ang unathorized fare hikes mamahimong makamulta sa operator og P5,000 alang sa first offense, P10,000 alang sa second offense, ug P15,000 alang sa third offense ug kanselahon usab ang prangkisa niini.
Aduna’y 11,800 ka mga PUJ ang anaa sa Central Visayas ug gibutyag usab ni Montealto nga modagan pa og duha ka semana bag-o mahurot og panguha ang maong mga jeep sa bag-ong taripa.
Pasabot niini nga ang P8 dili na kini bag-o tungod kay tuig 2008 mao na kini ang minimum fare sa Central Visayas apan nibalik lang sa P6.50 tungod sa ubos ang presyo sa lana niadtong panahona.