SUPERBALITA CEBU

State of calamity sa Toledo giduso

GIPALABANG sa konseho sa dakbayan sa Toledo sa unang pagbasa apan may kondisyon, ang resolusyon nga magsagop sa deklarasyon sa Cebu Provincial Board nga ubos sa state of calamity ang probinsya sa Sugbo gumikan sa kadaot nga namugna sa hinay nga El Niño.

Sa special session nga gipahigayon sa konseho sa siyudad niadtong Huwebes, Mayo 9, nitumaw ang gamay nga lalis human gikwestyon ni Konsehal Arlene Zambo ang pagpalabang sa resolusyon gumikan kay gusto niini makita una kon unsa ang mga programa, proyekto ug aktibidad nga gamitan sa quick response fund (QRF) sa city government, sa dili pa nila kini aprobahan.

Sa resolusyon nga giduso ni Konsehal Jay Sigue, chairman sa committee on environment sa konseho, wa masukip kon unsay gamitan sa QRF.

“It’s like approving a blank check. We cannot deny suspicion where the funds will be used,” pahayag ni Zambo, labi na tulo na lang ka adlaw sa dili pa ang piniliay sa Mayo 13.

Si Sigue nidepensa nga dili angay hunahunaon nga ang pagpasar sa resolusyon gamiton sa pagpangampanya tungod kay nanginahanglan og dinalian nga tabang ang katawhan gikan sa kagamhanan sa siyudad gumikan sa kakuwangan sa tubig.

“This resolution is not for campaigning. This resolution is for the people needing water,” padayag sa batan-ong konsehal.

Alang ni Toledo City Mayor John Henry “Sonny” Osmeña katungod sa mga miyembro sa konseho kon unsay gusto niini hunahunaon sa pagduso sa resolusyon nga magsagop sa deklarasyon sa PB.

“It’s their privilege. It’s their right to doubt, to suspect whatever they want to think. I will not worry about that, it’s up to them. If they are going to be insincere and insensitive to the needs of the people of Toledo, they should be answerable to the people,” sigon sa mayor sa pakighinabi sa Superbalita Cebu.

Si kanhi kongresista Pablo John Garcia, makaatbang ni Osmeña sa pagka kongresista sa nagsingabot nga piniliay, nisugyot nga human na sa piniliay ipasar ang resolusyon sa konseho.

“Aron mawagtang ang duda, huwaton na lang sunod semana,” sumala niini.

Aron malikayan ang pagduda, si Bise Mayor Antonio Yapha Jr, presiding officer sa konseho, nisugyot og win-win solution nga giuyonan sa walo ka mga konsehal nga nitambong sa session, nga unya na aprobahan sa ikaduhang pagbasa ang resolusyon nga giduso ni Sigue human sa eleksyon.

Si Presiding Officer Pro-Tempore Marjorie Perales, makaatbang ni Zambo sa pagkamayor, nisugyot nga ipasar kini sa sunod session nila sa Mayo 20.

Si Sigue ug Perales, mga kaalyado ni Osmeña sa Team Alagad samtang si Zambo kandidato sa One Cebu-Partido Demokratiko Pilipino–Lakas ng Bayan (PDP-Laban).

Matod ni Sigue, tumong sa resolusyon nga magpalit og dugang usa ka delivery truck nga maoy maghatod og tubig ngadto sa kabarangayan tungod kay dili paigo ang usa ka trak nga maoy nagsige og hatod og tubig karon matag adlaw.

Si Engr. Alexander Dennis Abella, pangu sa City Disaster Risk Reduction and Management Office (CDRRMO), nibutyag nga sa 38 ka mga barangay sa siyudad, 17 niini ang wala nay supply sa tubig gumikan sa El Niño.

Kini naglakip sa Gen. Climaco, Tungkay, Pangamihan, Canlumampao, Carmen, Capt. Claudio, Subayon, Putingbato, Sagay, Sam-ang, Cambang-ug, Loay, Bagakay, Biga, Bunga, Campo 8 ug Landahan.

Sa report sa City Agricultural Services nga gisumitir ngadto sa CDRRMO, niabot og P2.9 milyones ang gibanabana nga kadaot sa mais, humay, utanon, saging ug kamote sa mga barangay Campo 8, Carmen, Talavera, Awihao, ug Canlumampao tungod kay way supply sa tubig.

Moabot sa P100 milyones ang pundo sa DRRM ug P30 milyones niini alang sa QRF o 30 porsyento sa kinatibuk-ang pundo.

Ang Carmen Copper Corporation (CCC) niabag sa siyudad paghatag og tubig ngadto sa upat ka mga barangay nga moabot sa average nga 68,000 ka litro ang ma-supply matag adlaw nga gikan sa Malubog Dam.

Si Sofia Picardal, senior corporate communication officer sa CCC, niingon katulo sa usa ka semana kini maghatod og tubig sa Barangay Don Andres Soriano, 16,000 ka litro matag adlaw; ug tag 10,000 ka litro matag adlaw sa Media Once ug Poog.

Sa Barangay Biga, matag adlaw mag-supply ang CCC og 32,000 ka litro sa tubig.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph