PADAYON pang gisusi sa Carmen Municipal Police Station (MPS) ang motibo sa pagpatay sa wala pa mailhing lalaki nga nakaplagan daplin sa dalan niadtong Lunes, Mayo 6.
Patay’ng lawas sa biktima nakit-an nga nagbuy-od daplin sa dalan sa may Purok 5-B, Barangay Magsaysay, Carmen, Davao del Norte.
Sumala pa nga nakadawat og tawag ang Carmen MPS nga nagpahibawo sa nakitang patay nga lawas sa dapit hinungdan nga gisusi sa mga pulis, pangulohan ni Police Chief Master Sergeant Adonis Estenzo.
Ang biktima gihulagway nga gibana-banang nagpangedaron og 40-45 anyos, dunay gitas-on nga 5’5”, nagsul-ob og itom nga t-shirt, dunay grey trekker short pants ug tattoo sa iyang tuong braso nga kaka.
Nasayran nga gawas sa pagtadtad sa lawas sa biktima, duna sab kini dakong samad sa liog.
Way nakuha nga identification card o mga personal nga gamit sa biktima ang kapulisan nga mag-ila unta kaniya.
Wala say nakuhang mga ebidensiya gikan sa crime scene aron nga makatumbok sa mga mamumuno.
Patay nga lawas sa biktima gihatud ngadto sa Carmen District Hospital.
Sa gihimong imbestigasyon, nasayran nga mga bandang alas 5:40 sa buntag sa maong adlaw, usa ka grupo sa mga trabahante sa sagingan nga padulong sa trabaho maoya nakakaplag sa biktima nga nagbuy-og sa kilid sa dalan sa maong dapit.
Gilayong gipahibawo si Brgy. Kagawad Manliguez ug mao nay nanawag ngadto sa Carmen MPS.
Gikanayon sa mga molupyo sa lugar nga sa wala pa makit-i ang patay nga lawas, nakadungog sila og sakyanan nga niagi sa maong dalan.
Apan wala lang nila kini tagda, gumikan kay normal lang alang kanila nga dunay pipila ka mga sakyanan nga mosulod ug gawas sa dalan nagsumpay kini sa mga kasikbit nga mga barangay.
Dugang nasayran nga ang dalan walay mga suga ug lagyo ang mga nagpuyo.