10 oras ra puwede mobiyahe ang Angkas drivers

SUGBO. Sa pagbalik sa Angkas, rekisito sa Department of Transportation nga dili molapas sa 10-oras ang biyaheon sa usa ka rider matag adlaw.  (SunStar photo/Amper Campaña)
SUGBO. Sa pagbalik sa Angkas, rekisito sa Department of Transportation nga dili molapas sa 10-oras ang biyaheon sa usa ka rider matag adlaw. (SunStar photo/Amper Campaña)

SA PAGBALIK sa Angkas sa kadalanan, usa sa rekisito nga gilagda sa Department of Transportation (DOTr) nga dili molapas sa 10-oras ang biyaheon sa usa ka rider matag adlaw.

Usa lang kini sa lagda sa maong ahensiya dihang niluwat kini og unom ka buwan nga pilot implementation sugod karong buwan sa Hunyo.

Moabot sa 27,000 ka mga riders gikan sa Metro Manila ug Cebu City ang aduna’y pagtugot sa maong ahensiya nga modagan pagbalik ang maong ride-hailing application.

Sa guidelines sa DOTr, unom ka buwan usab nga tun-an sa Technical Working Group (TWG) ang kalambuan sa maong matang nga transportasyon.

Kon ugaling moabot na sa 5 percent ang aksidente sa kinatibuk-ang gidaghanon sa riders, magtigom dayon ang TWG aron pagahisgutan kini.

Gawas nga 10 ka oras lang ang gitugot nga oras sa riders sa Angkas, dili puwede mosakay ang nagpangedaron og 7-anyos ug paubos.

Base sa taripa nga gilagda sa DOTr, anaa sa P20 ang unang kilometro sa Angkas, ug dugang P16 sa mosunod nga kilometro hangtod 8 ka kilometros ug P20 matag kilometro kon molapas na sa 8 ka kilometros ang gi-book.

“The final report of the TWG will be submitted to the House of Representatives and Senate which shall serve as valuable inputs for legislative action,” tipik sa guidelines sa DOTr.

Gikataho nga aduna’y 6,000 ka Angkas riders ang Sugbo.

Tuig 2017 dihang gipahunong sa Land Transportation Franchising and Regulatory Board ang operasyon sa Angkas tungod wala kini prangkisa isip usa ka legal nga matang sa transportasyon.

Nabalik kini niadtong 2018 pinaagi sa desisyon sa Mandaluyong Regional Trial Court pinaagi sa preliminary injuction apan milulwat og temporary restraining order ang Supreme Court niadtong Disyembre.

Bisan paman niini, padayon ang maong matang nga transportasyon sa Sugbo diin ginganlan kini og Angkas Padala.

Molungtad hangtod Disyembre ang pilot implementation.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph